نیویارک(ویب ڈیسک): نیویارک اسٹیٹ نرسز ایسوسی ایشن (NYSNA) نے اعلان کیا ہے کہ ایک ثالث (Arbitrator) نے مورگن اسٹینلے چلڈرن ہسپتال کے پیڈیاٹرک انٹینسیو کیئر یونٹ میں کام کرنے والی نرسوں کے حق میں تقریباً 4 لاکھ ڈالر کے ہرجانے کا فیصلہ سنایا ہے۔
یہ فیصلہ یکم جنوری 2023 سے 31 مئی 2024 کے دوران یونٹ میں عملے کی غیر محفوظ تعداد سے متعلق ہونے والی تحقیقات کے بعد سامنے آیا ہے۔ تحقیقات میں یہ انکشاف ہوا کہ:
ہسپتال انتظامیہ نے نرسوں کے ساتھ کیے گئے معاہدوں کی خلاف ورزی کی۔
پیڈیاٹرک کارڈیک انٹینسیو کیئر یونٹ میں ضرورت کے مطابق نرسوں کی بھرتی اور ان کی برقرار رکھنے میں ناکامی ہوئی۔
عملے کی شدید کمی کی وجہ سے نرسوں پر کام کا بوجھ بڑھا، جس سے مریضوں کی حفاظت بھی متاثر ہوئی۔
اب تک ثالثی کے فیصلوں کے ذریعے نیویارک پریسبیٹیرین کی نرسوں کے لیے مجموعی طور پر 6 لاکھ 75 ہزار ڈالر اور 141 اضافی چھٹیوں کا اعلان کیا جا چکا ہے۔ تاہم، نرسوں کو ابھی تک کوئی مالی معاوضہ نہیں ملا کیونکہ ہسپتال انتظامیہ نے ہر فیصلے کے خلاف فیڈرل کورٹ میں اپیل دائر کر رکھی ہے۔
دوسری جانب، ہزاروں نرسیں اپنی تاریخی ہڑتال کے چھٹے ہفتے میں داخل ہو چکی ہیں۔ نرسز یونین کا موقف ہے کہ ہسپتال کی انتظامیہ نرسوں اور مریضوں کے لیے محفوظ اسٹافنگ لیول فراہم کرنے سے مسلسل انکار کر رہی ہے، جس کے باعث وہ احتجاج پر مجبور ہیں۔
