نیویارک: نیویارک کی تاریخ کی سب سے طویل اور بڑی ہڑتال کے 29 ویں روز کچھ اسپتالوں اور نرسوں کے درمیان معاہدہ طے پا گیا ہے، تاہم ہزاروں نرسیں اب بھی اپنی مانگوں کے حق میں ڈٹی ہوئی ہیں۔
نیویارک اسٹیٹ نرسز ایسوسی ایشن (NYSNA) کے مطابق، 10,500 ہڑتالی نرسوں نے مونٹیفیور، ماؤنٹ سینائی اور ماؤنٹ سینائی مارننگ سائیڈ اسپتالوں کے ساتھ عارضی معاہدہ کر لیا ہے۔ اس معاہدے کے تحت نرسوں کو اگلے تین سالوں میں تنخواہوں میں 12 فیصد اضافہ اور عملے کی تعداد میں بہتری جیسی اہم کامیابیاں ملی ہیں۔ اگر یہ معاہدہ حتمی طور پر منظور ہو جاتا ہے، تو نرسیں 14 فروری سے کام پر واپس لوٹ آئیں گی۔
ایسوسی ایشن کی صدر نینسی ہیگنز کا کہنا ہے کہ “ہم سر فخر سے بلند کر کے واپس جا رہی ہیں کیونکہ ہم نے بہتر اسٹافنگ ریشو، کام کی جگہ پر تشدد سے تحفظ اور صحت کی بہتر سہولیات جیسے مطالبات منوا لیے ہیں۔”
دوسری جانب، نیویارک-پریس بیٹیرین (NewYork-Presbyterian) کے ساتھ مذاکرات تعطل کا شکار ہونے کے باعث 4,000 سے زائد نرسیں اب بھی ہڑتال پر ہیں۔ اسپتال انتظامیہ کا کہنا ہے کہ انہوں نے ثالثوں کی تجویز تسلیم کر لی ہے جس میں تنخواہوں میں اضافہ اور پنشن کا تحفظ شامل ہے، مگر فی الحال یونین کے ساتھ حتمی اتفاق ہونا باقی ہے۔
