نیویارک: میئر ظہران ممدانی نے جمعرات کے روز ایک ایگزیکٹو آرڈر پر دستخط کیے ہیں جس کے تحت شہر کے ہر محکمے میں ایک ‘چیف سیونگز آفیسر’ (Chief Savings Officer) تعینات کرنا لازمی قرار دے دیا گیا ہے۔ اس اقدام کا مقصد نیویارک شہر کو درپیش اربوں ڈالر کے بجٹ خسارے کو ختم کرنا ہے۔
میئر ممدانی کے مطابق، سال 2026 اور 2027 کے درمیان شہر کو 12 بلین ڈالر کے بڑے بجٹ خسارے کا سامنا ہے۔
ممدانی نے صرف دو ہفتوں کے اندر متوازن بجٹ پیش کرنے کا ہدف مقرر کیا ہے۔ اس سلسلے میں انہوں نے سابق میئر ایرک ایڈمز کے دور کے ایک AI پروگرام کو ختم کرنے کا اشارہ دیا ہے، جس کی لاگت 5 لاکھ ڈالر ہے۔
میئر کا کہنا ہے کہ بجٹ کو متوازن کرنے کے لیے تین چیزیں ضروری ہیں:
محکموں کے اندرونی اخراجات میں بچت۔
ریاست نیویارک کے ساتھ نئے تعلقات۔
امیر ترین نیویارکرز پر ٹیکس کا نفاذ۔
میئر ممدانی کا ‘امیروں پر ٹیکس’ لگانے کا منصوبہ گورنر کیتھی ہوچل کی منظوری پر منحصر ہے، جو مسلسل یہ کہہ رہی ہیں کہ وہ ٹیکسوں میں اضافہ نہیں کریں گی۔ دوسری جانب، سٹی کمپٹرولر مارک لیون نے بھی خبردار کیا ہے کہ اس بڑے مالیاتی خلا کو پُر کرنے کے لیے انتہائی “مشکل فیصلے” کرنا ہوں گے۔
