ڈھاکہ(ویب ڈیسک): کرکٹ اسکاٹ لینڈ کو انٹرنیشنل کرکٹ کونسل (آئی سی سی) کی جانب سے یقین دہانی کروائی گئی ہے کہ ٹی ٹوئنٹی ورلڈ کپ کے لیے اسکاٹ لینڈ کے کھلاڑیوں کو بروقت بھارتی ویزے دلوانے کے لیے بھرپور اور سنجیدہ کوششیں کی جا رہی ہیں۔ ان کھلاڑیوں میں پاکستانی نژاد فاسٹ بولر صفیان شریف بھی شامل ہیں۔
بنگلادیش کی آخری لمحات میں ورلڈ کپ سے دستبرداری کے بعد اسکاٹ لینڈ کو ایونٹ میں شامل کیا گیا، کیونکہ وہ اس وقت سب سے زیادہ رینکنگ رکھنے والی وہ ٹیم تھی جو براہِ راست کوالیفائی نہیں کر سکی تھی۔ اس فیصلے کے بعد پیر کے روز اسکاٹ لینڈ نے اپنے 15 رکنی اسکواڈ کا اعلان کیا، جو رواں ہفتے بھارت روانہ ہونا ہے۔
بھارت اور پاکستان کے درمیان سیاسی و سفارتی کشیدگی کے باعث حالیہ برسوں میں پاکستانی شہریوں اور پاکستانی نژاد افراد کو بھارتی ویزوں کے حصول میں مشکلات اور تاخیر کا سامنا رہا ہے، جس کی زد میں کئی بین الاقوامی کرکٹرز بھی آئے ہیں۔ اس کے باوجود کرکٹ اسکاٹ لینڈ کو امید ہے کہ صفیان شریف کو وقت پر ویزا مل جائے گا۔ صفیان شریف کی پیدائش ہڈرزفیلڈ میں ہوئی، ان کے والد پاکستانی جبکہ والدہ برطانوی نژاد پاکستانی ہیں، اور وہ سات سال کی عمر میں اسکاٹ لینڈ منتقل ہو گئے تھے۔
کرکٹ اسکاٹ لینڈ کی چیف ایگزیکٹو کے مطابق آئی سی سی کے ساتھ مل کر اس مسئلے کے حل کے لیے بھرپور کوششیں جاری ہیں۔ ان کا کہنا تھا کہ ویزوں کا معاملہ ہمیشہ غیر یقینی ہوتا ہے، چاہے وقت زیادہ ہو یا کم، تاہم گزشتہ 48 گھنٹوں سے تمام تر توجہ کھلاڑیوں کے ویزوں کی تکمیل پر مرکوز ہے۔
انہوں نے بتایا کہ کھلاڑی ویزا درخواستوں کے عمل میں ہیں اور ٹیم جلد بھارت پہنچ جائے گی۔ ان کے مطابق آئی سی سی ان تمام امور میں مکمل تعاون کر رہی ہے جو اس کے دائرہ اختیار میں آتے ہیں، اور اس سلسلے میں بھارتی کرکٹ بورڈ (بی سی سی آئی) اور مقامی حکام سے بھی رابطے میں ہے۔
ان کا مزید کہنا تھا کہ آئی سی سی نہ صرف اسکاٹ لینڈ بلکہ ورلڈ کپ میں شریک تمام 19 ٹیموں کی مدد کر رہی ہے، تاہم موجودہ صورتحال میں اسکاٹ لینڈ ان کی اولین ترجیح ہے۔
ادھر اسکاٹ لینڈ نے کسی بھی ممکنہ تاخیر سے نمٹنے کے لیے دو ٹریولنگ ریزرو اور تین نان ٹریولنگ ریزرو کھلاڑیوں کے ویزوں کے لیے بھی درخواست دینے کا فیصلہ کیا ہے۔
ٹیم کے ہیڈ آف پرفارمنس اسٹیو اسنیل نے آئی سی سی کے تعاون کو سراہتے ہوئے کہا کہ انہیں بھارتی کرکٹ بورڈ سے بھی مکمل تعاون کی توقع ہے۔ ان کا کہنا تھا کہ ورلڈ کپ میں مدعو کیے جانے کے بعد اگر کسی ٹیم کو ملک میں داخلے میں مشکلات کا سامنا کرنا پڑے تو یہ ایک نامناسب صورتحال ہو گی۔
اسکاٹ لینڈ کی ٹیم 2 اور 4 فروری کو بنگلور میں افغانستان اور نمیبیا کے خلاف وارم اپ میچز کھیلے گی، جبکہ 7 فروری کو کولکتہ میں ویسٹ انڈیز کے خلاف اپنے ورلڈ کپ سفر کا آغاز کرے گی۔ گروپ بی میں اسکاٹ لینڈ کو اٹلی، انگلینڈ اور نیپال کے خلاف بھی مقابلے کھیلنے ہیں، جہاں ابتدائی دو ٹیمیں سپر 8 مرحلے میں جگہ بنائیں گی۔
کرکٹ اسکاٹ لینڈ کا کہنا ہے کہ اسکواڈ کی حتمی شرکت تمام کھلاڑیوں اور آفیشلز کے ویزوں کی منظوری سے مشروط ہے، اسی لیے محدود وقت کے پیش نظر اضافی ریزرو کھلاڑیوں کا انتخاب کیا گیا ہے۔
