نیویارک: نیویارک سٹی کے نو منتخب میئر نے شہر کے ایک تاریخی اور کلاسیکی مقام پر ایک غیر معمولی کھیل کا اہتمام کر کے سب کو حیران کر دیا۔ یہ منفرد واچ پارٹی افریقہ کپ آف نیشنز کے فائنل میچ کے لیے منعقد کی گئی، جو مین ہیٹن کے سرروگیٹس کورٹ کی عمارت میں ہوئی
اس تقریب میں نیویارک کے میئر زوران ممدانی نے خصوصی شرکت کی اور شرکاء کے جوش و خروش کو مزید بڑھا دیا۔
تقریب سے خطاب کرتے ہوئے میئر زوران ممدانی نے افریقی براعظم سے اپنی وابستگی کا اظہار کیا۔ انہوں نے 2002 کے ورلڈ کپ میں سینیگال کی تاریخی جیت اور حال ہی میں مراکش کی شاندار کارکردگی کو یاد کرتے ہوئے کہا کہ “چاہے آپ سینیگال کے حامی ہوں یا مراکش کے، ہم سب کو فٹ بال کا وہ کھیل جوڑتا ہے جو ہمیں زندگی دیتا ہے۔”
اس موقع پر نہ صرف مقامی سیاستدان بلکہ بین الاقوامی سفارت کاروں کی بھی بڑی تعداد موجود تھی۔ مین ہٹن کے بورو پریزیڈنٹ بریڈ ہولمین سیگل، سٹی کونسل کے اراکین اور جنوبی افریقہ، مراکش، نائیجیریا، گنی، متحدہ عرب امارات اور میکسیکو کے قونصل جنرلز نے بھی تقریب میں شرکت کی۔
میئر ممدانی نے اپنی تقریر کے اختتام پر فٹ بال کے مداحوں کا شکریہ ادا کیا اور ایک دستخط شدہ فٹ بال وہاں موجود ایک بچے کو تحفے میں دیا۔ تقریب کے میزبان “کول گنز” (The Kooligans) نے بتایا کہ میئر کا وژن ہے کہ ورلڈ کپ کے دوران نیویارک میں اس طرح کی مزید مفت تقریبات منعقد کی جائیں تاکہ کمیونٹی کو متحد کیا جا سکے۔
مراکش اور سینیگال کے درمیان ہونے والے اس اہم میچ کے لیے شائقین کا جوش دیدنی تھا۔ نیویارک کی سڑکوں پر “دیمہ مغرب” کے نعرے گونجتے رہے اور لوگ اپنی اپنی ٹیموں کی جرسیوں میں ملبوس افریقی فٹ بال کے اس بڑے میلے کا جشن مناتے رہے۔
