جرمن صدر کا انتباہ: ‘دنیا کو لٹیروں کے ٹھکانے میں بدلنے سے بچانا ہوگا’

برلن(ویب ڈیسک): جرمنی کے صدر فرینک والٹر اسٹین مائر نے امریکی صدر ڈونلڈ ٹرمپ کی حالیہ خارجہ پالیسیوں اور بیانات پر کڑی تنقید کرتے ہوئے عالمی برادری کو خبردار کیا ہے کہ بین الاقوامی قوانین کی پامالی دنیا کو انتشار کی طرف دھکیل سکتی ہے۔

برلن میں ایک تقریب سے خطاب کرتے ہوئے جرمن صدر نے کہا کہ اگر عالمی اتحاد اور طے شدہ ضابطوں کو نظر انداز کیا گیا، تو دنیا ایک ایسی جگہ بن جائے گی جہاں صرف طاقتور کی حکمرانی ہوگی۔ ان کے اہم نکات درج ذیل ہیں:

انہوں نے روس کی جانب سے یوکرین پر حملے اور کریمیا کے الحاق کا حوالہ دیتے ہوئے کہا کہ اب امریکہ کی حالیہ پالیسیاں بھی عالمی جمہوری اقدار اور بین الاقوامی قانون کے لیے ایک بڑا خطرہ بن چکی ہیں۔

صدر اسٹین مائر نے خدشہ ظاہر کیا کہ قوانین کی غیر موجودگی میں طاقتور ممالک کمزور ریاستوں کو اپنی مرضی کے تابع کر لیں گے، جس سے چھوٹے ممالک کی خودمختاری ختم ہو جائے گی۔

انہوں نے زور دیا کہ موجودہ حالات میں یورپ کو متحد ہو کر عالمی قوانین کے دفاع کے لیے ایک مضبوط اور واضح مؤقف اپنایا ہوگا۔

جرمن صدر کا یہ سخت ردِعمل امریکی صدر ڈونلڈ ٹرمپ کے اس بیان کے بعد سامنے آیا ہے جس میں انہوں نے خود کو ہر قسم کے قانونی پابندیوں سے بالاتر قرار دیا تھا۔

ٹرمپ نے دعویٰ کیا تھا کہ بطور ‘کمانڈر انچیف’ انہیں دنیا کے کسی بھی ملک پر حملے کا لامحدود اختیار حاصل ہے۔

امریکی صدر کے مطابق ان کے فیصلوں پر کسی کا بس نہیں چلتا اور وہ صرف اپنی ذاتی سوچ اور اخلاقیات کے مطابق کارروائی کا فیصلہ کرتے ہیں۔

جرمن صدر نے اپنے خطاب کے آخر میں عالمی برادری کو جھنجھوڑتے ہوئے کہا کہ دنیا کو “لٹیروں کے ٹھکانے” میں تبدیل ہونے سے روکنا ہم سب کی مشترکہ ذمہ داری ہے۔ انہوں نے واضح کیا کہ بین الاقوامی قانون کی مضبوطی ہی عالمی امن اور جمہوریت کی بقا کی ضمانت ہے۔