کیلیفورنیا میں ایک خاندانی اجتماع کے دوران فائرنگ کے واقعے میں کم از کم چار افراد ہلاک اور دس زخمی ہو گئے .
حکام کےمطابق فائرنگ کاواقعہ ہفتہ کی شام ریاست کے شمالی شہر اسٹاکٹن کے ایک ریستوران میں پیش آیا۔ پولیس کا کہنا ہے کہ ہلاک ہونے والوں میں بالغ افراد کے ساتھ بچے بھی شامل ہیں، جبکہ زخمیوں کی حالت کے بارے میں ابھی معلومات سامنے نہیں آئی ہیں۔
حکام کے مطابق حملہ آور فرار ہے اور ابتدائی تحقیقات سے شبہ ہے کہ یہ واقعہ “ٹارگٹڈ” تھا۔
نائب میئر جیسن لی نے سوشل میڈیا پر لکھا:”سالگرہ کی تقریب کبھی ایسی جگہ نہیں ہونی چاہیے جہاں خاندان اپنی جانوں کے لیے خوفزدہ ہوں۔”
سان جواکین کاؤنٹی شیریف آفس کے مطابق واقعہ مقامی وقت کے مطابق شام 6 بجے سے کچھ پہلے پیش آیا۔ حکام نے عینی شاہدین، ویڈیو رکھنے والے افراد اور واقعے سے متعلق کسی بھی معلومات والے شہریوں سے رابطہ کرنے کی اپیل کی ہے۔
شیریف آفس کی ترجمان ہیچر برینٹ نے واقعے کو “ناقابلِ فہم” قرار دیتے ہوئے کہا کہ تحقیقات جاری ہیں اور معلومات محدود ہیں۔
انہوں نے مزید کہا: “ابتدائی اشارے بتاتے ہیں کہ یہ ٹارگٹڈ واقعہ ہو سکتا ہے، اور تفتیش کار تمام امکانات کا جائزہ لے رہے ہیں۔”
اسٹاکٹن کی میئر کرسٹینا فوگا زی نے بھی شدید تشویش کا اظہار کرتے ہوئے کہا:
“یہ ناقابلِ قبول ہے۔ خاندانوں کو اسپتالوں میں اپنے پیاروں کے بچنے کی دعائیں نہیں کرنی چاہئیں، بلکہ انہیں ایک ساتھ ہونا چاہیے۔”
کیلیفورنیا میں امریکہ کے سخت ترین اسلحہ قوانین نافذ ہیں، لیکن حالیہ سالوں میں ان قوانین کو چیلنجز کا سامنا رہا ہے۔
2021 میں ایک وفاقی جج نے ریاست میں حملہ آور رائفلز جیسے AR-15 پر پابندی کو کالعدم قرار دیا، اور 2022 میں امریکی سپریم کورٹ نے بندوق رکھنے کے حقوق کو توسیع دی، جس سے کیلیفورنیا کے مشابہ قوانین کو بھی خطرات لاحق ہوئے۔
