کولمبو: سری لنکا کے دارالحکومت میں شدید طوفانی بارش کے پیشِ نظرمکمل علاقے زیرِ آب آگئے ہیں، شدید بارشیں اور مٹی کے تودے گرنے کے واقعات پیش آئے ہیں۔ حکام نے تقریباً 200 ہلاکتوں اور درجنوں لوگوں کے لاپتہ ہونے کی اطلاع دی ہے۔
یہ ملک میں کئی سالوں کا سب سے مہلک قدرتی سانحہ ہے۔ ڈیزاسٹر مینجمنٹ سینٹر (DMC) نے بتایا کہ سمندری طوفان “دتواہ” (Cyclone Ditwah) کی وجہ سے ایک ہفتے کی شدید بارشوں کے بعد کم از کم 193 افراد ہلاک ہو چکے ہیں، جبکہ 228 افراد لاپتہ ہیں۔
ڈی ایم سی نے کہا کہ کیلانی ندی (Kelani River) میں پانی کی سطح تیزی سے بڑھنے کی وجہ سے کولمبو کے شمالی حصے زیرِ آب آ گئے ہیں۔ ڈی ایم سی کے ایک عہدیدار نے کہا، “اگرچہ طوفان ہم سے دور ہو چکا ہے، لیکن اب ندی کے بالائی علاقوں میں شدید بارشیں کیلانی ندی کے کناروں کے ساتھ نچلے علاقوں میں سیلاب کا سبب بن رہی ہیں۔”
کولمبو سے 156 میل (250 کلومیٹر) شمال مشرق میں واقع شہر منمپیتیا (Manampitiya) میں پانی کی سطح کم ہو رہی ہے، جس سے بڑے پیمانے پر تباہی سامنے آ رہی ہے۔ 72 سالہ رہائشی ایس سیوانندن نے کہا، “منمپیتیا ایک سیلاب زدہ شہر ہے، لیکن میں نے کبھی پانی کا اتنا بڑا حجم نہیں دیکھا۔”
انہوں نے مقامی نیوز سینٹر پورٹل کو بتایا کہ کاروبار اور املاک کو بڑے پیمانے پر نقصان پہنچا ہے۔ ان کی دکان کے بالکل سامنے ایک کار الٹی پڑی ہوئی تھی۔
پہاڑی ڈھلوانوں کی استحکام پر نظر رکھنے والے نیشنل بلڈنگ ریسرچ آرگنائزیشن نے کہا کہ مزید مٹی کے تودے گرنے کا زیادہ خطرہ ہے کیونکہ پہاڑی ڈھلوانیں اب بھی بارش کے پانی سے سیر (saturated) ہیں۔
