انسٹاگرام اورواٹس ایپ میں’Muse Image’اے آئی ٹول متعارف

کیلیفورنیا: سوشل میڈیا کی دنیا پر راج کرنے والی کمپنی میٹا (Meta) نے پہلی بار اپنے مقبول ترین پلیٹ فارمز، انسٹاگرام اور واٹس ایپ کے لیے ایک انتہائی جدید جنریٹو اے آئی (AI) امیج جنریشن فیچر متعارف کرا دیا ہے۔

اس فیچر کی مدد سے صارفین اب صرف سادہ تحریری ہدایات (Prompts) یا سادہ اسکیچز کی مدد سے نئی تصاویر بنا سکیں گے اور پہلے سے موجود تصاویر میں تبدیلیاں بھی کر سکیں گے۔

میٹا کے مطابق اس نئے فیچر کا نام ‘میوز امیج’ (Muse Image) رکھا گیا ہے، جسے کمپنی کی ‘میوز سپر انٹیلی جنس لیب’ نے خصوصی طور پر تیار کیا ہے۔ اس جدید ٹول کو ‘میتا اے آئی’ (Meta AI) چیٹ بوٹ کا حصہ بنایا جا رہا ہے۔

کمپنی کا کہنا ہے کہ میوز امیج صارفین کے لیے ایک بہترین تخلیقی پارٹنر (Creative Partner) ثابت ہوگا، جو ان کے تصورات اور خیالات کو سیکنڈوں میں اعلیٰ معیار (High Quality) کی تصاویر میں تبدیل کرنے کی صلاحیت رکھتا ہے۔

اس فیچر کو استعمال کرنا انتہائی آسان ہے:
اگر کوئی صارف نئی تصویر بنانا چاہتا ہے یا اپنی کسی پرانی تصویر کا بیک گراؤنڈ، کپڑے یا کوئی اور چیز تبدیل کرنا چاہتا ہے، تو اسے صرف سادہ زبان میں میٹا اے آئی کو بتانا ہوگا۔

صارف کی ہدایات کو سمجھتے ہوئے اے آئی خودکار طریقے سے تصویر تیار کر دے گا۔

صارفین ان تیار کردہ تصاویر کو نہ صرف اپنے فون میں ڈاؤن لوڈ کر سکیں گے، بلکہ براہِ راست انسٹاگرام فیڈ، اسٹوری یا واٹس ایپ چیٹ میں اپنے دوستوں کے ساتھ شیئر بھی کر سکیں گے۔

میٹا نے واضح کیا ہے کہ دنیا بھر میں انسٹاگرام اور واٹس ایپ استعمال کرنے والے صارفین کی تعداد 3 ارب سے زیادہ ہے۔

تاہم، ‘میوز امیج’ فیچر کو فی الحال ابتدائی مرحلے میں صرف چند منتخب ممالک میں ہی پیش کیا جا رہا ہے۔ ٹیسٹنگ کے بعد اس کی کارکردگی کو دیکھتے ہوئے بہت جلد اسے دنیا کے دیگر تمام ممالک میں بھی مرحلہ وار فعال کر دیا جائے گا۔