عاطف خان | 7نومبر
نیویارک :نیویارک میں پاکستان کے قونصل جنرل جناب عامر احمد اتوزئی نے “انڈر دی سیم اسکائی” (Under the Same Sky) کے عنوان سے منعقدہ آرٹ نمائش میں شرکت کی۔
یہ نمائش پاکستانی نژاد امریکی نوجوان مصورہ محترمہ علینہ کی جانب سے **Daira Global** میں منعقد کی گئی، جس میں پاکستان کے بیس جدید فنکاروں کے فن پارے پیش کیے گئے۔ نمائش کا مقصد بچپن کی معصومیت اور انسانیت کی یکسانیت کو فن کے ذریعے اجاگر کرنا تھا۔
تقریب نے پاکستانی فنکاروں کے تخلیقی اظہار اور ان کے فن کے بین الثقافتی اثرات کو اجاگر کیا۔ اس کا ایک اہم مقصد پاکستانی فنکاروں کو عالمی سطح پر متعارف کرانا اور ان کی تخلیقی صلاحیتوں کے لیے مالی و ادارہ جاتی معاونت فراہم کرنا تھا۔
قونصل جنرل عامر احمد اتوزئی نے اس اقدام کو سراہتے ہوئے کہا کہ اس طرح کے ثقافتی پروگرام پاکستان اور امریکہ کے درمیان تعلقات کو مزید مضبوط بناتے ہیں اور پاکستان کے متنوع اور بھرپور فن پاروں کو عالمی سطح پر نمایاں کرتے ہیں۔
