نیوارک (ویب ڈیسک): امریکی ریاست نیو جرسی کے شہر نیوارک (Newark) میں شدید گرمی کی لہر اور حبس کے پیشِ نظر انتظامیہ نے ’کوڈ ریڈ‘ (Code Red) الرٹ جاری کر دیا ہے۔ محکمۂ موسمیات کے مطابق شہر میں ہیٹ انڈیکس (شدتِ حرارت) 100 ڈگری فارن ہائیٹ تک پہنچنے کا امکان ظاہر کیا گیا ہے۔
انتظامیہ کے مطابق یہ ’کوڈ ریڈ‘ الرٹ جمعرات کی صبح 11:00 بجے سے جمعہ کی رات 8:00 بجے تک نافذ العمل رہے گا۔
نیوارک کے شہریوں کو ہدایت کی گئی ہے کہ وہ ہیٹ اسٹروک، شدید تھکاوٹ اور گرمی سے پیدا ہونے والی دیگر بیماریوں سے بچنے کے لیے ضروری احتیاطی تدابیر اختیار کریں۔
حساس افراد: بزرگ، بچے اور بیمار افراد کو ضرورت کے بغیر دھوپ میں نکلنے اور بیرونی سرگرمیوں سے گریزی کی ہدایت کی گئی ہے۔
کوڈ ریڈ کے دوران شہر بھر میں تمام شہریوں اور بے گھر افراد کے لیے کولنگ سینٹرز کھول دیے گئے ہیں۔ شہری اپنے قریب ترین کولنگ سینٹر کی معلومات کے لیے فون نمبر (973) 733-4311 پر رابطہ کر سکتے ہیں۔
اگر کوئی شخص کسی بے گھر فرد کو مدد کی ضرورت میں دیکھے تو وہ 855-11 پر ”Path Home“ لکھ کر میسج کر سکتا ہے، جس کے بعد اسٹریٹ آؤٹ ریچ ٹیمیں فوراً مدد کے لیے پہنچیں گی۔
اس کے علاوہ شہری گرمی کی شدت سے بچنے کے لیے شہر کے عوامی پارکوں کا رخ بھی کر سکتے ہیں جہاں سایہ دار جگہوں، اسپلش پیڈز (Splash Pads)، پینے کے پانی اور عوامی بیت الخلاء کی سہولیات موجود ہیں۔