جوہانسبرگ (ویب ڈیسک):انٹرنیشنل کرکٹ کونسل (ICC) نے 2027 میں جنوبی افریقہ، زمبابوے اور نمیبیا میں مشترکہ طور پر کھیلے جانے والے ’آئی سی سی مینز کرکٹ ورلڈ کپ 2027‘ کے لیے 12 میزبان میدانوں (Venues) کا باضابطہ اعلان کر دیا ہے۔
اس تاریخی اعلان کا اہتمام جوہانسبرگ میں منعقدہ ایک پروقار تقریبِ رونمائی کے دوران کیا گیا، جہاں جنوبی افریقہ کے 8، زمبابوے کے 3 اور نمیبیا کا 1 اسٹیڈیم ورلڈ کپ میچوں کی میزبانی کے لیے منتخب کیا گیا۔
یہ 24 سال کے طویل عرصے بعد پہلا موقع ہوگا کہ 50 اوورز کا کرکٹ ورلڈ کپ افریقی براعظم میں واپس آ رہا ہے۔ اس سے قبل 2003 میں جنوبی افریقہ، زمبابوے اور کینیا نے مشترکہ طور پر اس ایونٹ کی میزبانی کی تھی۔ 2027 کا ورلڈ کپ ”Three Nations, One Heartbeat“ (تین ملک، ایک دھڑکن) کے تھیم اور افریقی فلسفے ’اقدار اور بھائی چارہ‘ (Ubuntu) کے تحت کھیلا جائے گا۔
میزبان ممالک اور اسٹیڈیمز کی فہرست:
1. جنوبی افریقہ (8 مقامات):
وانڈررز اسٹیڈیم (جوہانسبرگ)
سپر اسپورٹس پارک (سینچورین / تشوانے)
نیولینڈز کرکٹ گراؤنڈ (کیپ ٹاؤن)
کنگز میڈ کرکٹ گراؤنڈ (ڈربن)
سینٹ جارجز پارک (گیبرہا)
مانگاونگ اوول (بلومفونٹین)
بولینڈ پارک (پارل)
بفیلو پارک (کگومپو سٹی / ایسٹ لنڈن)
2. زمبابوے (3 مقامات):
ہرارے اسپورٹس کلب (ہرارے)
کوئنز اسپورٹس کلب (بُلاوایو)
فالے موسیٰ اووا تونیا انٹرنیشنل اسٹیڈیم (وکٹوریہ فالز)
3. نمیبیا (1 مقام):
نمیبیا کرکٹ گراؤنڈ (ونڈہوک)
آئی سی سی کے چیئرمین جے شاہ نے اس موقع پر گفتگو کرتے ہوئے کہا:
”24 سال بعد افریقہ میں ورلڈ کپ کی واپسی عالمی کرکٹ کے لیے ایک تاریخی لمحہ ہے۔ ہمیں کامل یقین ہے کہ جنوبی افریقہ، زمبابوے اور نمیبیا مل کر دنیا بھر کے شائقین کو ایک ناقابلِ فراموش ایونٹ فراہم کریں گے۔“
تقریب میں کرکٹ کی نامور شخصیات نے شرکت کی، جن میں گریم اسمتھ، مکھایا نتینی، ہاشم آملہ، ٹیمبا باووما، کاگیسو ربادا، ہملٹن مساکادزا اور روڈولف جانسن وین وورین شامل تھے۔
2027 کے ورلڈ کپ میں دنیا کی 14 سرفہرست ٹیمیں حصہ لیں گی اور کل 57 میچز کھیلے جائیں گے۔ ٹورنامنٹ کو مزید دلچسپ اور مسابقتی بنانے کے لیے 3 مراحل پر مشتمل ایک نیا فارمیٹ متعارف کرایا گیا ہے، جس میں سپر سیریز، 6، 6 ٹیموں کے دو گروپس (راؤنڈ روبن)، اور اس کے بعد سپر سیون (Super Seven) کے مقابلے ہوں گے، جس کے بعد ٹاپ 4 ٹیمیں سیمی فائنل کے لیے کوالیفائی کریں گی۔