نیویارک / نیو جرسی: کینیڈا کے جنگلات میں لگنے والی شدید آگ کا دھواں امریکی ریاستوں نیویارک اور نیو جرسی کی فضا پر محیط ہو گیا ہے، جس کے بعد مقامی حکام نے فضائی آلودگی کے پیش نظر ہیلتھ الرٹ (Health Alert) جاری کر دیا ہے۔ برطانوی نشریاتی ادارے کے مطابق حکام نے شہریوں کو ہدایت کی ہے کہ وہ غیر ضروری طور پر گھروں سے باہر نہ نکلیں اور شدید جسمانی مشقت یا سرگرمیوں سے گریز کریں۔
یہ صورتحال ایک ایسے وقت میں سامنے آئی ہے جب 19 جولائی کو اسپین اور ارجنٹینا کے درمیان فیفا ورلڈ کپ (FIFA World Cup) کا فائنل نیویارک نیو جرسی اسٹیڈیم میں شیڈول ہے، جہاں 80 ہزار سے زائد شائقین کی آمد متوقع ہے۔ اگرچہ فی الوقت میچ کے شیڈول میں کسی قسم کی تبدیلی کا اعلان نہیں کیا گیا، تاہم شدید دھند اور آلودہ فضا کے باعث میچ کے انعقاد سے متعلق خدشات جنم لے رہے ہیں۔
اسپین کی ٹیم بدھ کے روز نیو جرسی پہنچنے کے بعد جمعرات کو کھلے میدان میں معمول کی پریکٹس کرتی رہی، جبکہ ارجنٹینا کی ٹیم جمعہ کے روز اپنا تربیتی سیشن کرے گی۔
دوسری جانب، خراب فضائی معیار کے اثرات دیگر کھیلوں پر بھی دیکھے گئے ہیں۔ نیشنل ویمنز ساکر لیگ (NWSL) کے ایک میچ میں ایئر کوالٹی کی خراب صورتحال کی وجہ سے ہر ہاف میں اضافی بریک دیے گئے، جس پر بعض کھلاڑیوں نے تشویش کا اظہار کیا۔ علاوہ ازیں، شکاگو میں میجر لیگ ساکر (MLS) کا ایک میچ خراب فضائی معیار کی وجہ سے ملتوی کر دیا گیا۔
محکمہ موسمیات نے امید ظاہر کی ہے کہ جمعہ اور ہفتے کے روز ہونے والی متوقع بارش کے باعث فضائی معیار میں بہتری آئے گی، جس سے ایئر کوالٹی انڈیکس بحال ہونے کا امکان ہے۔