نیویارک: سٹی میئر زہران ممدانی اور محکمہ ٹرانسپورٹیشن (DOT) کے کمشنر مائیک فلن نے مڈ ٹاؤن مین ہٹن کے معروف ‘پارک ایونیو’ کو گرین کوریڈور میں تبدیل کرنے کے لیے ڈیزائن کانسیپٹس کی نقاب کشائی کر دی ہے۔
اس منصوبے کا مقصد گاڑیوں کے لیے مختص لینز کو کم کر کے پیدل چلنے والوں کے لیے کشادہ راستے، ہریالی اور بیٹھنے کی جگہ بنانا ہے۔
یہ مجوزہ ری ڈیزائن 11 بلاکس (46 ویں سے 57 ویں اسٹریٹ) پر محیط ہے اور یہ براہِ راست گرینڈ سینٹرل ٹرمینل کے ٹرین شیڈ کے اوپر واقع ہے۔ جہاں ایم ٹی اے (MTA) زیرِ زمین ڈھانچے کی بحالی کا کام کر رہی ہے، وہیں سٹی گورنمنٹ سڑک کے اوپری حصے کو عوامی مفاد کے مطابق جدید بنا رہی ہے۔
سڑک کے بیچ موجود گرین بیلٹ (Medians) کو بڑا کیا جائے گا، جس میں پودے، بیٹھنے کے بنچ اور پیدل چلنے کے راستے شامل ہوں گے۔
سڑک کے دونوں اطراف سے ٹریفک کی ایک ایک لین ختم کر دی جائے گی تاکہ عوامی جگہ کے لیے گنجائش پیدا کی جا سکے۔
شمالاً جنوباً سائیکل لین اور میڈینز کو آپس میں جوڑنے کے لیے نئی کراس واکس متعارف کرائی جائیں گی۔
یہ ڈیزائن عوامی سروے، ورکشاپس اور اسٹیک ہولڈرز کے ساتھ مشاورت کے بعد تیار کیا گیا ہے۔
میئر ممدانی کا کہنا ہے کہ “ہم پارک ایونیو میں ‘پارک’ کا عنصر واپس لا رہے ہیں۔ ہماری ترجیح عوامی جگہوں کو عوام کے لیے بہتر بنانا ہے تاکہ نیویارک کی سڑکیں دنیا کے لیے ایک مثال بن سکیں۔”