اقوامِ متحدہ (نیویارک)، 4 مارچ 2026: اقوامِ متحدہ میں منعقدہ ایک یادگاری تقریب میں ممتاز پاکستانی سفارتکار رفیع الدین احمد کی بین الاقوامی سفارت کاری اور کثیرالجہتی تعاون کے فروغ میں تقریباً پانچ دہائیوں پر محیط خدمات کو شاندار الفاظ میں خراجِ عقیدت پیش کیا گیا۔
یہ تقریب پاکستان کے مستقل مشن برائے اقوامِ متحدہ کی جانب سے اقوامِ متحدہ کے ترقیاتی پروگرام (UNDP) اور اقوامِ متحدہ کے محکمہ اقتصادی و سماجی امور (DESA) کے اشتراک سے منعقد کی گئی، جس میں سفارتکاروں، اقوامِ متحدہ کے اعلیٰ حکام، مرحوم کے اہلِ خانہ، سابق رفقائے کار اور دوستوں کی بڑی تعداد نے شرکت کی۔ تقریب کی صدارت پاکستان کے مستقل مندوب برائے اقوامِ متحدہ سفیر عاصم افتخار احمد نے کی۔
تقریب سے خطاب کرتے ہوئے مقررین نے کہا کہ رفیع الدین احمد نے اقوامِ متحدہ میں تقریباً پچاس برس تک غیر متزلزل عزم اور گہری وابستگی کے ساتھ خدمات انجام دیں۔ ان کی قیادت نے پائیدار ترقی، اقتصادی تعاون اور جامع کثیرالجہتی پالیسی سازی کے فروغ میں نمایاں کردار ادا کیا۔ مقررین کے مطابق مرحوم کی پہچان صرف ان کی پیشہ ورانہ مہارت نہیں تھی بلکہ وہ انسانی ہمدردی، بردباری اور رہنمائی کی خصوصیات بھی اپنے ساتھ رکھتے تھے۔
اپنے افتتاحی خطاب میں سفیر عاصم افتخار احمد نے مرحوم کو “پاکستان کا سپوت اور دنیا کا شہری” قرار دیتے ہوئے کہا کہ ان کا انتقال اقوامِ متحدہ کے لیے ایک ایسا خلا چھوڑ گیا ہے جسے پُر کرنا آسان نہیں ہوگا۔ انہوں نے کہا کہ رفیع الدین احمد نے عالمی سفارت کاری میں جو معیار قائم کیا، وہ آنے والی نسلوں کے لیے مشعلِ راہ ہے۔
اس موقع پر اقوامِ متحدہ کے انڈر سیکریٹری جنرل برائے اقتصادی و سماجی امور لی جون ہوا نے سیکریٹری جنرل کی جانب سے پیغام دیتے ہوئے کہا کہ رفیع الدین احمد کی زندگی دیانت، خدمت اور بین الاقوامی تعاون کے بنیادی اصولوں کی عملی مثال تھی۔ ان کے بقول مرحوم کے لیے کثیرالجہتی نظام محض سفارتی ڈھانچہ نہیں بلکہ اجتماعی ذمہ داری اور مشترکہ ترقی کا اخلاقی عزم تھا۔
تقریب میں مرحوم کے اہلِ خانہ نے بھی شرکت کی۔ ان کے بڑے بیٹے ضیاء احمد نے پاکستان کے مستقل مشن اور شرکاء کا شکریہ ادا کرتے ہوئے اپنے والد کو ایک باوقار، نرم دل اور بصیرت رکھنے والے انسان کے طور پر یاد کیا۔ انہوں نے کہا کہ ان کے والد ہر چیلنج کا باریک بینی سے جائزہ لیتے اور ہمیشہ متوازن اور عملی حل پیش کرتے تھے۔
پاکستان کے سابق سیکریٹری خارجہ اور اقوامِ متحدہ میں سابق مستقل مندوب شمشاد احمد خان اور سابق مستقل مندوب سفیر منیر اکرم نے بھی مرحوم کی پیشہ ورانہ خدمات اور ذاتی رہنمائی کو خراجِ تحسین پیش کیا۔
تقریب میں متعدد عالمی شخصیات نے ویڈیو پیغامات اور تحریری پیغامات کے ذریعے بھی مرحوم کی خدمات کو سراہا، جبکہ پروگرام کے دوران ان کی زندگی اور سفارتی کیریئر کے اہم لمحات پر مبنی ایک دستاویزی فلم بھی پیش کی گئی۔
