نیویارک: اقوامِ متحدہ میں پاکستان کے مستقل مندوب سفیر عاصم افتخار احمد نے سلامتی کونسل کے اجلاس سے خطاب کرتے ہوئے مشرقِ وسطیٰ میں یورپی یونین (EU) کے سفارتی اور انسانی ہمدردی کے کردار کو سراہا ہے۔
انہوں نے فلسطین کے سوال پر یورپی یونین کے اصولی موقف اور بین الاقوامی قانون کے مطابق ‘دو ریاستی حل’ کی مستقل حمایت کا اعتراف کیا۔
سفیر عاصم افتخار نے اپنے بیان میں زور دیا کہ یورپی یونین اپنے عالمی اثر و رسوخ اور سفارتی طاقت (Leverage) کو بروئے کار لاتے ہوئے فلسطینی عوام کی مشکلات کے خاتمے میں کلیدی کردار ادا کر سکتی ہے۔
انہوں نے کہا کہ عالمی برادری کی جانب سے فلسطینیوں کے حقِ خودارادیت اور آزاد ریاست کے قیام کے لیے جاری کوششوں کو یورپی یونین کی جانب سے مزید تقویت ملنی چاہیے۔
پاکستانی مندوب نے مزید کہا کہ خطے میں پائیدار امن اسی صورت ممکن ہے جب اقوامِ متحدہ کی قراردادوں اور بین الاقوامی جواز کے مطابق فلسطینیوں کو ان کے جائز حقوق فراہم کیے جائیں۔ انہوں نے یورپی یونین اور اقوامِ متحدہ کی شراکت داری کو عالمی بحرانوں کے حل کے لیے ایک مضبوط پلیٹ فارم قرار دیا۔