نیویارک (ویب ڈیسک): نیویارک پولیس ڈیپارٹمنٹ (NYPD) کو اس وقت ایک سنگین انتظامی چیلنج کا سامنا ہے، جہاں جوائنٹ ٹیررازم ٹاسک فورس (JTTF) کے نصف سے زائد اہلکار اور ہزاروں سینیئر افسران کسی بھی وقت ریٹائر ہونے کے اہل ہو چکے ہیں۔ اس صورتحال نے شہر میں جرائم اور دہشت گردی کے خلاف جنگ کے مستقبل کے حوالے سے حکام کو تشویش میں مبتلا کر دیا ہے۔
یونین ڈیٹا کے مطابق، جے ٹی ٹی ایف کے 82 میں سے 45 جاسوس (55%) اپنی 20 سالہ سروس مکمل کر چکے ہیں اور مکمل پنشن کے ساتھ ریٹائر ہو سکتے ہیں۔ مجموعی طور پر 5,121 فعال جاسوسوں میں سے 23 فیصد اسی زمرے میں آتے ہیں۔ اس کے علاوہ 66 فیصد کپتان، 42 فیصد لیفٹیننٹ اور 22 فیصد سارجنٹ بھی ریٹائرمنٹ کے دہانے پر ہیں۔
پولیس یونینز کا کہنا ہے کہ میئر زہران ممدانی کی جانب سے اوور ٹائم میں ممکنہ کٹوتیوں کے خوف نے افسران کو وقت سے پہلے ریٹائرمنٹ پر مجبور کر دیا ہے۔ چونکہ پنشن کا تعین آخری سال کی مجموعی آمدنی (بشمول اوور ٹائم) پر ہوتا ہے، اس لیے افسران سابق میئر ایڈمز کے دور کی بہتر تنخواہوں کو اپنی پنشن کی بنیاد بنانا چاہتے ہیں۔
یونین صدور کے مطابق، فیلڈ میں پولیس افسران کو ہراساں کیے جانے اور میئر کی جانب سے عدم تعاون کے تاثر نے بھی فورس کے مورال کو متاثر کیا ہے، جس کی وجہ سے کئی سینیئر اہلکار اب اپنے بچوں کو اس پیشے میں آنے سے روک رہے ہیں۔