نیویارک: نیویارک سٹی کے میئر زہران ممدانی نے شہریوں کو خبردار کیا ہے کہ طوفان کی پہلی لہر گزرنے کے باوجود خطرہ ابھی ٹلا نہیں ہے، اور آج رات شہر میں مزید دو بارشی اور طوفانی لہریں متوقع ہیں۔
میئر نے اپنے خصوصی پیغام میں بتایا کہ پہلی طوفانی لہر شہر سے گزر چکی ہے، تاہم محکمہ موسمیات کے مطابق آج رات بارش اور گرج چمک کے مزید دو دور آئیں گے۔ پہلا دور شام 6 بجے کے قریب اور دوسرا آدھی رات کے وقت شروع ہونے کا امکان ہے۔
انہوں نے شہریوں سے اپیل کی کہ وہ مسلسل احتیاط برتیں۔ تیز بارش، تیز ہواؤں یا بجلی کی گرج چمک کی صورت میں فوری طور پر گھروں یا محفوظ مقامات کے اندر چلے جائیں۔
میئر زہران مامدانی کا کہنا تھا کہ شہر کی انتظامیہ صورتحال سے نمٹنے کے لیے مکمل تیار ہے۔ محکمہ پانی (@NYCWater) نے بارش کے دوران گشت دگنا کر دیا ہے اور وہ محکمہ ٹرانسپورٹ (@NYC_DOT) اور سینیٹیشن (@NYCSanitation) کے ساتھ مل کر کام کر رہا ہے تاکہ سڑکوں پر پانی جمع نہ ہو اور گٹروں کی صفائی کو یقینی بنایا جا سکے۔
اس کے علاوہ، گرے ہوئے درختوں کو ہٹانے والی ٹاسک فورس، ٹو ٹرک ٹاسک فورس، اور ہائی واٹر ریسکیو ٹیمیں بھی ہائی الرٹ پر ہیں اور کسی بھی ہنگامی صورتحال میں فوری کارروائی کے لیے تیار ہیں۔ انتظامیہ نے شہریوں کو ہدایت کی ہے کہ کسی بھی جگہ گرے ہوئے درخت یا بند گٹر کی اطلاع دینے کے لیے 311 پر اور پانی میں پھنسنے یا فوری خطرے کی صورت میں فوراً 911 پر کال کریں۔