نیویارک: نیویارک سٹی کے میئر زہران ممدانی نے برونکس کے علاقے ‘دی پیننسولا’ (The Peninsula) میں شہر کے پہلے سرکاری گروسری اسٹور (City-owned grocery store) کے قیام کا اعلان کیا ہے۔ یہ اسٹور اگلے سال تک عوام کے لیے کھول دیا جائے گا، جو شہر بھر میں قائم کیے جانے والے پانچ سرکاری اسٹورز میں سے پہلا ہوگا۔
دلچسپ بات یہ ہے کہ یہ اسٹور ایک سابقہ جووینائل ڈیٹینشن سینٹر (کم عمر مجرموں کی جیل) کی جگہ پر بنایا جا رہا ہے۔ اس جگہ پر اسٹور کے علاوہ 740 نئے سستے رہائشی اپارٹمنٹس (Affordable Housing) بھی تعمیر کیے جائیں گے۔ میئر زہران ممدانی نے تقریب سے خطاب کرتے ہوئے کہا، “یہ جگہ کبھی ناکامی کی علامت تھی، لیکن آج ہم اس جگہ کو ایک نئی کہانی لکھنے کے لیے استعمال کر رہے ہیں۔ یہ اسٹور اس بات کا ثبوت ہوگا کہ حکومت عوامی بھلائی کے لیے ایک بہترین طاقت بن سکتی ہے۔”
یہ سرکاری اسٹور 20,000 اسکوائر فٹ پر محیط ہوگا۔ میئر نے واضح کیا کہ ان سرکاری اسٹورز پر نجی دکانوں کی طرح زیادہ منافع بخش اشیاء جیسے سگریٹ، تمباکو یا لاٹری ٹکٹ فروخت نہیں کیے جائیں گے، بلکہ عام استعمال کی سستی اور معیاری اشیاء فراہم کی جائیں گی۔ اقتصادی انصاف کی ڈپٹی میئر جولی سو (Julie Su) نے بتایا کہ ہنٹس پوائنٹ میں 2027 تک اسٹور کے باقاعدہ آغاز کے لیے اس موسمِ گرما میں پروپوزل (RFPs) طلب کیے جائیں گے۔
برونکس اور مین ہٹن (جو 2029 میں کھلے گا) کے علاوہ برکلن، کوئینز اور اسٹیٹن آئی لینڈ میں بھی ایسے اسٹورز کے مقامات کی نشاندہی کے لیے ایک آن لائن پورٹل کھول دیا گیا ہے۔ باقی تمام اسٹورز کم از کم 10,000 اسکوائر فٹ کے ہوں گے۔ میئر ممدانی کے مطابق، اس پورے منصوبے پر شہر کے بجٹ سے 70 ملین ڈالر (7 کروڑ ڈالر) کی لاگت آئے گی۔
