نیویارک کے میئر زوہران ممدانی نے فیفا ورلڈ کپ 2026 (FIFA World Cup™) کے حوالے سے ایک خصوصی پروموشنل ویڈیو جاری کی ہے، جس میں نیویارک شہر کو فٹ بال کے عالمی مرکز کے طور پر پیش کیا گیا ہے۔ اس ویڈیو کا مقصد دنیا کو یہ دکھانا ہے کہ نیویارک کس طرح دنیا بھر سے آئے تارکینِ وطن اور مقامی کمیونٹیز کے ملاپ سے فٹ بال کا اصل دارالحکومت بن چکا ہے۔
اس ویڈیو میں امریکی فٹ بال ٹیم کے اسٹار کھلاڑی ٹم ویہ (Tim Weah)، گوتھم ایف سی (Gotham FC) کی نامور خواتین کھلاڑی مڈج پرس (Midge Purce) اور برونکس سے تعلق رکھنے والے موراڈ فرید (Morad Fareed) شامل ہیں۔ موراڈ فرید اس لحاظ سے تاریخی شخصیت ہیں کہ وہ فلسطین کی اس پہلی نیشنل فٹ بال ٹیم کا حصہ تھے جس نے 2006 کے ورلڈ کپ کوالیفیکیشن میں حصہ لیا تھا۔ ویڈیو میں ‘برونکس ہائی اسکول آف سائنس’ کے نوجوان کھلاڑیوں کو بھی دکھایا گیا ہے، جہاں خود میئر ممدانی اپنے طالب علمی کے دور میں فٹ بال کھیلا کرتے تھے۔
نیویارک کے مشہور ترین مقامات بشمول ‘امریکن میوزیم آف نیچرل ہسٹری’ میں فلمائی گئی یہ ویڈیو نیویارک میں فٹ بال کے ہر رنگ کو اجاگر کرتی ہے— اسکول کے میدانوں میں کھیلتے بچوں سے لے کر اعلیٰ ترین سطح پر مقابلہ کرتی خواتین کھلاڑیوں تک۔
میئر زہران ممدانی نے اپنے جذبات کا اظہار کرتے ہوئے کہا:”میں اسی شہر میں پلا بڑھا ہوں اور اپنے ان پڑوسیوں کے ساتھ ورلڈ کپ میچز دیکھتا تھا جن کا تعلق دنیا کے الگ الگ کونوں سے تھا۔ نیویارک کی یہی خوبصورتی ہے کہ یہاں پوری دنیا پہلے ہی سے بستی ہے۔ اس موسمِ گرما میں ہمیں اس خوبصورتی کو پوری دنیا کے ساتھ شیئر کرنے کا موقع مل رہا ہے۔ مجھے ایک نیویارکر ہونے اور اس شہر کے میئر کے طور پر خدمت کرنے پر بے حد فخر ہے۔”
یہ پروموشنل ویڈیو میئر کے دفتر میں ابتدائی مہینوں کی سرگرمیوں، بشمول ‘ساکر اسٹریٹس’ پروگرامنگ، اور بروکلین میں ہونے والی چیمپئنز لیگ فائنل واچ پارٹی کے مناظر پر مبنی ہے۔ واضح رہے کہ نیویارک سٹی 2026 فیفا ورلڈ کپ کا ایک اہم ترین میزبان شہر ہے، جہاں میچز میٹ لائف اسٹیڈیم (MetLife Stadium) میں کھیلے جائیں گے جبکہ پورے شہر کے پانچوں اضلاع (Boroughs) میں فین زونز اور خصوصی پروگرامز منعقد ہوں گے۔
