واشنگٹن: امریکی صدر ڈونلڈ ٹرمپ نے ایران کے ساتھ جنگ بندی مذاکرات کے لیے اپنے خصوصی وفد کو عین وقت پر پاکستان جانے سے روک دیا ہے۔
صدر ٹرمپ نے واضح کیا ہے کہ امریکی ایلچی اسٹیو وٹکوف اور جیرڈ کشنر اب اسلام آباد نہیں جائیں گے، کیونکہ ان کے بقول ایران کے ساتھ مذاکرات کے لیے “سارے پتّے” اب امریکہ کے پاس ہیں۔
فاکس نیوز اور ٹروتھ سوشل پر جاری بیانات میں صدر ٹرمپ نے کہا کہ 18 گھنٹے کی طویل پرواز اور صرف زبانی جمع خرچ کے لیے وقت ضائع کرنے کی ضرورت نہیں ہے۔
انہوں نے ایران کی قیادت میں اندرونی اختلافات اور کنفیوژن کا دعویٰ کرتے ہوئے کہا کہ اگر ایران بات چیت میں سنجیدہ ہے تو اسے خود امریکہ سے رابطہ کرنا ہوگا۔
جیرڈ کشنر اور اسٹیو وٹکوف کا دورہ پاکستان منسوخ کر دیا گیا ہے، جو آج شام روانہ ہونے والے تھے۔
ٹرمپ کا سخت موقف: صدر ٹرمپ نے دعویٰ کیا کہ امریکہ اس وقت جنگ میں غالب ہے اور ایران کے پاس کوئی اختیار نہیں۔
جنگ بندی کی صورتحال: دورے کی منسوخی کے باوجود صدر ٹرمپ نے واضح کیا کہ اس کا مطلب ایران کے خلاف جنگ کا دوبارہ آغاز نہیں ہے۔
ایرانی وزیر خارجہ کی روانگی: امریکی وفد کے انتظار اور ملاقات کے امکانات ختم ہونے کے بعد ایرانی وزیر خارجہ عباس عراقچی اسلام آباد سے مسقط روانہ ہو گئے ہیں۔
