نیویارک(ویب ڈیسک): اقوام متحدہ میں پاکستان کے مستقل مندوب سفیر عاصم افتخار احمد نے دیگر ممالک کے ہمراہ اقوام متحدہ کے سیکرٹری جنرل انتونیو گوتریس سے ملاقات کی اور انہیں “باروورز پلیٹ فارم” (Borrowers’ Platform) کے قیام کے حوالے سے ہونے والی حالیہ پیشرفت پر بریفنگ دی۔
سفیر عاصم افتخار احمد کے ساتھ مصر، نیپال، مالدیپ اور زیمبیا کے مستقل مندوبین نے سیکرٹری جنرل کو اس اہم اقدام سے آگاہ کیا۔ وفد نے سیکرٹری جنرل کو 15 اپریل کو شیڈول اس پلیٹ فارم کی افتتاحی تقریب میں شرکت کی دعوت بھی دی، جسے انہوں نے خوشی سے قبول کرتے ہوئے اس اقدام کی مکمل حمایت کا یقین دلایا۔
25 مارچ 2026 کو جی 77 (G77) کے سفیروں کے اجلاس سے خطاب کرتے ہوئے سفیر عاصم افتخار احمد نے ترقی پذیر ممالک کو درپیش معاشی مسائل پر روشنی ڈالی۔ انہوں نے کہا ترقی پذیر ممالک قرضوں کی ادائیگی کے بوجھ اور سخت مالیاتی حالات کا شکار ہیں۔موجودہ عالمی مالیاتی ڈھانچہ زیادہ تر قرض دینے والے ممالک (Creditors) کے مفادات کے گرد گھومتا ہے۔
مقروض ممالک (Borrowers) کے لیے ایسا کوئی ادارہ جاتی پلیٹ فارم موجود نہیں تھا جہاں وہ اپنے تجربات بانٹ سکیں اور مشترکہ موقف اپنا سکیں۔
پاکستانی مندوب نے واضح کیا کہ یہ پلیٹ فارم کسی مخصوص گروہ بندی یا قرضوں کے مذاکرات کے لیے نہیں بنایا گیا، بلکہ اس کے مقاصد درج ذیل ہیں:
مقروض ممالک کے درمیان تعاون اور سیکھنے کے عمل کو فروغ دینا۔
عالمی مالیاتی بحث میں ترقی پذیر ممالک کی آواز کو مضبوط بنانا۔
اسے تمام رکن ممالک کے لیے کھلا اور ان کی ضروریات کے مطابق بنانا۔
گزشتہ سال اکتوبر میں واشنگٹن میں آئی ایم ایف اور ورلڈ بینک کے سالانہ اجلاسوں کے دوران اس پر اتفاق کیا گیا تھا۔ اب اس کا باقاعدہ آغاز 15 اپریل 2026 کو واشنگٹن میں ہونے والے آئی ایم ایف اور ورلڈ بینک کے موسم بہار (Spring Meetings) کے اجلاسوں کے موقع پر ہوگا۔
سفیر عاصم افتخار نے اس اعتماد کا اظہار کیا کہ جی 77 کے تعاون سے یہ پلیٹ فارم عالمی مالیاتی ڈھانچے میں ترقی پذیر ممالک کے مقام کو مستحکم کرنے میں سنگ میل ثابت ہوگا۔