دبئی (ویب ڈیسک): دبئی کی روڈز اینڈ ٹرانسپورٹ اتھارٹی (RTA) نے ‘کیولس-ایم ایچ آئی’ (Keolis-MHI) کے تعاون سے دبئی میٹرو اور ٹرام نیٹ ورک پر “سیفٹی اینڈ پبلک ٹرانسپورٹ ایٹیکیٹ” (حفاظت اور سفری آداب) کے نام سے ایک نئی آگاہی مہم شروع کی ہے۔
اس مہم کا مقصد عوامی نقل و حمل کے ذریعے سفر کرنے والے تمام مسافروں کے لیے آرام دہ، محفوظ اور احترام پر مبنی ماحول فراہم کرنا ہے۔
آر ٹی اے کے ریل آپریشنز ڈائریکٹر حسن المطوع نے بتایا کہ اس مہم کا مقصد مسافروں میں خوش اخلاقی اور بہتر طرزِ عمل کی حوصلہ افزائی کرنا ہے۔ انہوں نے چند بنیادی اصولوں پر عمل کرنے کی اپیل کی، جن میں شامل ہیں:
خواتین، بچوں اور گولڈ کلاس کے لیے مخصوص بوگیوں کا خیال رکھنا۔
معذور افراداور عمر رسیدہ شہریوں کو بیٹھنے کی جگہ فراہم کرنا۔
ٹرین کے دروازوں کے سامنے کھڑے ہونے سے گریز کرنا تاکہ مسافروں کی آمد و رفت متاثر نہ ہو۔
ساتھی مسافروں کے حقوق اور ان کی نجی جگہ (Privacy) کا خیال رکھنا۔
مہم کا ایک اہم پہلو اسٹیشنوں اور ٹرینوں کے اندر مسافروں کے بہاؤ کو بہتر بنانا ہے تاکہ رش اور تاخیر سے بچا جا سکے۔ حسن المطوع نے وضاحت کی کہ اس پیغام کو عام کرنے کے لیے اسٹیشنوں پر سائن بورڈز، ڈیجیٹل اسکرینز، سوشل میڈیا اور ٹرینوں کے اندر معلوماتی مواد کا سہارا لیا جا رہا ہے۔
اس مہم کو کامیاب بنانے کے لیے اسٹیشنوں کا عملہ، کسٹمر ہیپینس ٹیمیں، اور ٹکٹ انسپکٹرز براہِ راست مسافروں کی رہنمائی کریں گے۔ یہ ٹیمیں روزانہ کی بنیاد پر مسافروں سے بات چیت کریں گی تاکہ حفاظتی اصولوں اور سفری آداب پر فوری عمل درآمد یقینی بنایا جا سکے۔
آر ٹی اے کا کہنا ہے کہ پبلک ٹرانسپورٹ ایک مشترکہ جگہ ہے اور اس کا تحفظ سب کی ذمہ داری ہے۔ حسن المطوع نے اپنی گفتگو کا اختتام کرتے ہوئے کہا:”یہ مہم صرف یاد دہانی نہیں، بلکہ دبئی کی اس ثقافت کو مزید تقویت دینا ہے جہاں ہر فرد کا احترام کیا جاتا ہے، تاکہ ہر سفر محفوظ، ہموار اور پرسکون رہے۔”
