نیویارک: نیویارک سٹی کے میئر زوہران ممدانی نے اپنی انتظامیہ میں سینئر ایڈوائزر کی تقرری کا اعلان کر دیا ہے۔
میئر آفس کی جانب سے جاری بیان کے مطابق سٹی اور اسٹیٹ پالیسی و بجٹ امور میں وسیع تجربہ رکھنے والی سیمونیا براؤن کو سینئر ایڈوائزر برائے پالیسی اینڈ اسٹریٹجی مقرر کیا گیا ہے۔
اس عہدے پر سیمونیا براؤن میئر کے کم لاگتِ زندگی سے متعلق ایجنڈے پر عملدرآمد کے لیے البانی میں شراکت داروں کے ساتھ مل کر کام کریں گی اور فرسٹ ڈپٹی میئر کو رپورٹ کریں گی۔
سیمونیا براؤن کو نیویارک سٹی اور نیویارک اسٹیٹ حکومت میں بیس سال سے زائد کا تجربہ حاصل ہے، جہاں انہوں نے منتخب نمائندوں کو پالیسی اور بجٹ معاملات پر مشاورت فراہم کی اور اہم مذاکرات میں کلیدی کردار ادا کیا۔ سابق میئر بل ڈی بلاسو کے دور میں وہ نیویارک سٹی کے اسٹیٹ لیجسلیٹو افیئرز آفس کی ڈائریکٹر رہیں، جہاں شہر کے بجٹ اور قانون سازی کے ایجنڈے کو آگے بڑھانے کی ذمہ دار تھیں۔
اس سے قبل وہ نیویارک سٹی آفس آف مینجمنٹ اینڈ بجٹ میں ایسوسی ایٹ ڈائریکٹر کے طور پر خدمات انجام دے چکی ہیں، جہاں انہوں نے محکمہ تعلیم، سٹی یونیورسٹی آف نیویارک اور 59 کمیونٹی بورڈز کے بجٹس کی نگرانی کی۔ اسی دوران انہوں نے انٹرگورنمنٹل ریلیشنز یونٹ کی قیادت بھی کی، جس کے ذریعے شہری، ریاستی اور وفاقی سطح پر مالی ترجیحات کو مؤثر انداز میں اجاگر کیا گیا۔
سٹی حکومت میں شمولیت سے قبل سیمونیا براؤن نے نیویارک اسٹیٹ اسمبلی میں مختلف ذمہ داریاں انجام دیں، جہاں وہ اسپیکر اور اسمبلی قیادت کو مشاورت فراہم کرتی رہیں اور بجٹ تجزیہ، پالیسی سازی اور مذاکرات کی قیادت کی۔ وہ اس وقت آفس آف دی اسٹیٹ کمپٹرولر میں اسسٹنٹ ڈپٹی کمپٹرولر کے طور پر خدمات انجام دے رہی ہیں، جہاں وہ مقامی حکومتوں اور اسکول ڈسٹرکٹس کے مالی معاملات کی نگرانی کرتی ہیں، جن میں سالانہ ایک ارب ڈالر سے زائد فنڈز شامل ہیں۔
میئر زوہران ممدانی نے سیمونیا براؤن کو خوش آمدید کہتے ہوئے کہا کہ وہ ایک تجربہ کار اور پرعزم رہنما ہیں اور محنت کش طبقے کے لیے مؤثر بجٹس اور پالیسیوں کی تیاری میں ان کا تجربہ نیویارک کے شہریوں کے لیے کم لاگتِ زندگی کے ایجنڈے کو آگے بڑھانے میں نہایت اہم ثابت ہوگا۔
سیمونیا براؤن نے کہا کہ میئر ممدانی کی انتظامیہ کا حصہ بننا ان کے لیے اعزاز ہے۔ ان کے مطابق میئر ممدانی نے مہنگائی سے متاثر شہریوں کی نمائندگی کرتے ہوئے مضبوط قیادت کا مظاہرہ کیا ہے اور وہ البانی میں شراکت داروں کے ساتھ مل کر محنت کش خاندانوں کو حقیقی ریلیف فراہم کرنے کے لیے کام کرنے کی منتظر ہیں۔
