واشنگٹن / نیویارک:مشہور ویڈیو شیئرنگ ایپ ٹک ٹاک نے اپنی امریکی سرگرمیوں سے متعلق ایک اہم معاہدہ طے کر لیا ہے، جس کے تحت کمپنی نے اپنے امریکی آپریشن کا بڑا حصہ امریکی سرمایہ کاروں کے حوالے کرنے پر رضامندی ظاہر کر دی ہے۔
اس معاہدے کے بعد ٹک ٹاک اور امریکی حکومت کے درمیان کئی برسوں سے جاری کشمکش کا خاتمہ ہو گیا ہے۔
یہ پیش رفت بائٹ ڈانس کے چیف ایگزیکٹو شو چیؤ کی جانب سے جاری ایک اندرونی میمو میں سامنے آئی ہے، جس کے مطابق ایک نیا ادارہ “ٹک ٹاک یو ایس جوائنٹ وینچر” قائم کیا جا رہا ہے۔
معاہدے کے تحت امریکی سرمایہ کاروں کا ایک کنسورشیم ٹک ٹاک کے امریکی کاروبار پر نمایاں کنٹرول حاصل کرے گا۔ اس گروپ میں ٹیکنالوجی کی بڑی کمپنی اوریکل، پرائیویٹ ایکویٹی فرم سلور لیک اور متحدہ عرب امارات کی اے آئی سرمایہ کاری کمپنی ایم جی ایکس شامل ہیں۔ یہ تینوں ادارے مل کر ٹک ٹاک کے امریکی آپریشن کے 45 فیصد حصص کے مالک ہوں گے، جبکہ بائٹ ڈانس تقریباً 20 فیصد حصص اپنے پاس رکھے گا۔ نئے ادارے کو “TikTok USDS Joint Venture LLC” کا نام دیا گیا ہے۔
میمو کے مطابق یہ نیا ادارہ ایپ کی نگرانی کا ذمہ دار ہوگا، جس میں ڈیٹا پروٹیکشن، الگورتھم سیکیورٹی، مواد کی نگرانی اور سافٹ ویئر کی جانچ شامل ہے۔ دستاویز میں کہا گیا ہے کہ اوریکل کو بااعتماد سیکیورٹی پارٹنر کے طور پر نامزد کیا جائے گا، جو قومی سلامتی سے متعلق طے شدہ شرائط پر عملدرآمد کی جانچ کرے گا۔
معاہدے کی تکمیل کی تاریخ 22 جنوری 2026 مقرر کی گئی ہے۔ اس پیش رفت کی ابتدائی خبر امریکی خبر رساں ادارے Axios نے دی تھی۔
یہ معاہدہ بڑی حد تک اُس ایگزیکٹو آرڈر سے مماثلت رکھتا ہے جس پر سابق صدر ڈونلڈ ٹرمپ نے ستمبر میں دستخط کیے تھے، جس میں ٹک ٹاک کے امریکی آپریشنز کو امریکی سرمایہ کاروں کے حوالے کرنے کی منظوری دی گئی تھی۔
امریکی حکومت طویل عرصے سے قومی سلامتی کے خدشات کی بنیاد پر ٹک ٹاک کے امریکی کاروبار کو اس کی چینی پیرنٹ کمپنی بائٹ ڈانس سے الگ کرنے کی کوشش کر رہی تھی۔ اس معاہدے کو اسی سلسلے کی ایک بڑی پیش رفت قرار دیا جا رہا ہے۔
