واشنگٹن(ویب ڈیسک): امریکی خاتونِ اول اور صدر ڈونلڈ ٹرمپ کی اہلیہ میلانیا ٹرمپ پر بننے والی دستاویزی فلم ’میلانیا‘ کا پہلا سرکاری ٹریلر منظرِ عام پر آ گیا ہے، جس میں ان کی ذاتی زندگی اور عوامی کردار کے مختلف پہلوؤں کو اجاگر کیا گیا ہے۔
ٹریلر خود میلانیا ٹرمپ نے اپنے سوشل میڈیا اکاؤنٹ کے ذریعے شیئر کیا، جس کے بعد یہ فلم عالمی توجہ کا مرکز بن گئی۔
ٹریلر میں میلانیا ٹرمپ کو وائٹ ہاؤس کے مختلف حصوں میں گھومتے، ایئر فورس ون میں سفر کرتے، سرکاری و سماجی تقریبات میں شرکت کرتے اور نجی لمحات میں دکھایا گیا ہے۔ دستاویزی فلم میں وہ اپنی زندگی کے اہم فیصلوں، وائٹ ہاؤس میں گزارے گئے وقت اور خاتونِ اول کی حیثیت سے پیش آنے والے چیلنجز پر تفصیل سے گفتگو کرتی نظر آئیں گی۔
معروف فلمی ڈیٹا بیس آئی ایم ڈی بی کے مطابق یہ دستاویزی فلم ڈونلڈ ٹرمپ کی دوسری صدارتی حلف برداری سے قبل کے 20 دنوں کے واقعات پر مشتمل ہے۔ اس دوران انتخابی مہم کے بعد کے جذباتی حالات، سیاسی دباؤ اور ٹرمپ خاندان کی نجی سرگرمیوں کو بھی فلم میں شامل کیا گیا ہے۔
یہ فلم میلانیا ٹرمپ کی نئی پروڈکشن کمپنی ’میوز فلمز‘ کے بینر تلے تیار کی گئی ہے، جبکہ اس کی ہدایت کاری معروف ہالی ووڈ ڈائریکٹر بریٹ ریٹنر نے کی ہے، جو ایک طویل عرصے بعد فلمی دنیا میں واپسی کر رہے ہیں۔
ایمازون ایم جی ایم اسٹوڈیوز نے اس دستاویزی فلم کے حقوق تقریباً 40 ملین ڈالر میں حاصل کیے ہیں، جسے دستاویزی فلموں کی تاریخ کی ایک غیر معمولی اور مہنگی ڈیل قرار دیا جا رہا ہے۔
یہ فلم 30 جنوری 2026 کو دنیا بھر کے سینما گھروں میں ریلیز کی جائے گی، جس کے بعد اسے ایمازون پرائم ویڈیو پر اسٹریمنگ کے لیے بھی پیش کیا جائے گا۔
