رپورٹ|عاطف خان
ہیوسٹن: اسماعیلی سینٹر ہیوسٹن میں نئی “دارخانہ” کی افتتاحی تقریب منعقد کی گئی جس میں پرنس رحیم آغا خان نے خصوصی شرکت کی۔
اس ملاقات میں انہوں نے نوجوانوں کو رہنمائی، حوصلہ افزائی اور گرمجوشی سے لبریز گفتگو کے ذریعے مستقبل کے لیے ترغیب دی۔ یہ یادگار لمحہ جنوب مغربی امریکا کے نوجوانوں کے لیے فخر اور خوشی کا باعث بنا، جنہوں نے پرنس رحیم کی نصیحتوں اور دعاؤں کو قیمتی تحفہ قرار دیا۔
اس خصوصی ملاقات سے قبل، پرنس رحیم نے امریکا بھر کے ادارہ جاتی رہنماؤں سے ملاقات کی، جہاں کمیونٹی کی ترجیحات اور مستقبل کی حکمتِ عملیوں پر بات چیت کی گئی۔ اس گفتگو کا مقصد ادارہ جاتی صلاحیت کو مضبوط بنانا اور جماعت کی بدلتی ہوئی ضروریات کو مؤثر طریقے سے پورا کرنا تھا۔
اسماعیلی سینٹر نے ملک بھر سے آنے والے جامعہ و کالج کے طلبہ کی میزبانی بھی کی، جنہوں نے “Faces of the Future” کے عنوان سے ایک جدید اور تخلیقی آرٹ انسٹالیشن میں حصہ لیا۔ یہ نمائشی منصوبہ ان سیکڑوں تعلیمی اداروں کی علامت تھا جہاں اسماعیلی طلبہ تعلیم حاصل کر رہے ہیں، جو اُن کے اجتماعی علم، تخلیقی صلاحیت اور خدمتِ انسانیت کے عزم کو ظاہر کرتا ہے۔
