پشاور: پاکستان تحریک انصاف (پی ٹی آئی) نے بانی چیئرمین عمران خان کی رہائی اور آئین کی بالادستی کے لیے 27 ستمبر کو اسلام آباد کی طرف کاجلایا جانے والا مجوزہ لانگ مارچ 5 اکتوبر تک ملتوی کرنے کا فیصلہ کیا ہے۔ پارٹی ذرائع کے مطابق یہ فیصلہ پشاور میں پی ٹی آئی کی سیاسی کمیٹی کے اہم اجلاس کے دوران کیا گیا۔
ذرائع کا کہنا ہے کہ اس فیصلے کا باقاعدہ اعلان تحریک تحفظ آئینِ پاکستان (TTAP) کے سربراہ محمود خان اچکزئی اور مجلس وحدت مسلمین (MWM) کے قائد علامہ راجہ ناصر عباس کو اعتماد میں لینے کے بعد کیا جائے گا۔
اچکزئی اور پی ٹی آئی کے درمیان مشاورتی گفتگو: خیبر پختونخوا کے وزیراعلیٰ سہیل آفریدی نے اپوزیشن اتحاد کے سربراہ محمود خان اچکزئی سے ٹیلی فونک رابطہ کر کے مارچ ملتوی کرنے کی تجاویز پیش کیں۔ تاہم محمود خان اچکزئی نے 27 ستمبر کے احتجاج پر قائم رہنے کی تاکید کی اور حتمی فیصلہ مزید مشاورت سے مشروط کیا۔
پی ٹی آئی خیبر پختونخوا کے اطلاعاتی سیکریٹری شوکت یوسفزئی نے مارچ منسوخی کی خبروں کو مسترد کرتے ہوئے کہا کہ لانگ مارچ کی تمام تیاریاں مکمل ہیں اور حتمی فیصلہ صرف وفاقی حکومت کی جانب سے سنجیدہ مذاکرات کی صورت میں ہو سکتا ہے۔
کے پی کے گورنر فیصل کریم کنڈی نے پشاور میں میڈیا سے گفتگو کرتے ہوئے کہا کہ صوبے میں گورنر راج کے نفاذ کے حوالے سے قانونی اور آئینی مشاورت مکمل کر لی گئی ہے اور اس کا نفاذ ممکن ہے۔
لانگ مارچ کے پیش نظر اسلام آباد اور پنجاب کے مختلف اضلاع میں رینجرز کو تعينات کر کے اہم شاہراہوں کو کنٹینرز لگا کر بلاک کر دیا گیا ہے۔
وفاقی وزیر اطلاعات عطا للہ تارار نے پی ٹی آئی کو چیلنج دیتے ہوئے کہا کہ “اگر پی ٹی آئی میں ہمت ہے تو آئے اور اسلام آباد میں لانگ مارچ یا دھرنا دے کر دکھائے۔” انہوں نے الزام عائد کیا کہ پی ٹی آئی صوبائی وسائل کو غلط استعمال کر رہی ہے۔
وزیراعظم شہباز شریف نے اپوزیشن رہنما محمود خان اچکزئی کو دوبارہ خط بھیج کر مذاکرات اور الیکشن کمیشن کی تعیناتیوں پر بات چیت کی دعوت دی ہے۔