لاس اینجلس: پیرا ماؤنٹ اسکائی ڈانس نے امریکی ریاست کیلیفورنیا کی قیادت میں قائم ریاستوں کے اتحاد اور ہالی ووڈ رائٹرز یونین کے ساتھ جاری قانونی تنازع تصفیے پر ختم کر دیا ہے۔ 110 ارب ڈالر مالیت کا یہ معاہدہ میڈیا کی تاریخ کے سب سے بڑے انضمام کا راستہ ہموار کرے گا۔
یہ تصفیہ پیرا ماؤنٹ کے سی ای او ڈیوڈ ایلیسن کے لیے ایک بڑی کامیابی ہے، جنہوں نے ہالی ووڈ کی فلم، ٹی وی، اسٹریمنگ اور خبروں کے شعبوں پر اپنا اثر و رسوخ قائم کرنے کے لیے مہینوں قانونی جنگ لڑی۔ اس معاہدے کے تحت پیرا ماؤنٹ نے عارضی فلمی کوٹے اور ایک نیوز اوور سائٹ کمیٹی کے قیام کی شرائط قبول کر لی ہیں، جس کی وجہ سے کمپنی کو اپنے سی این این (CNN) جیسے کیبل اثاثے یا فلم فرنچائزز بیچنے سے استثنیٰ مل گیا ہے۔
کیلیفورنیا کے اٹارنی جنرل روب بونٹا نے پریس کانفرنس کرتے ہوئے کہا کہ اس معاہدے سے امریکہ میں پیداوار اور مقابلے کی فضا برقرار رہے گی۔ تصفیے کی شرائط کے تحت پیرا ماؤنٹ امریکہ میں فلم سازی پر سالانہ مزید 300 ملین ڈالر خرچ کرے گی۔ معاہدے کے ابتدائی دو سالوں میں سالانہ 30 فلمیں اور اگلے تین سالوں میں سالانہ 32 فلمیں تیار کی جائیں گی، جن میں سے کم از کم چار انڈیپینڈنٹ فلمیں اور 20 فیصد بلاک بسٹر فلمیں ہوں گی۔ کوٹہ پورا نہ کرنے کی صورت میں کمپنی فی فلم 30 ملین ڈالر جرمانہ ادا کرے گی۔
اس کے علاوہ کمپنی تین سال تک تھیٹر مالکان سے اضافی چارجز وصول نہیں کرے گی، جبکہ سی بی ایس (CBS) اور سی این این (CNN) جیسے خبری نیٹ ورکس کی خودمختاری کو یقینی بنانے کے لیے ایک انڈیپینڈنٹ ایڈٹوریل بورڈ قائم کرے گی۔
اگرچہ اس معاہدے کو وارنر برادرز کے شیئر ہولڈرز نے سراہا ہے اور کمپنی کے شیئرز میں 10 فیصد سے زائد کا اضافہ ہوا ہے، تاہم رائٹرز گلڈ آف امریکہ نے تشویش کا اظہار کرتے ہوئے کہا ہے کہ اس انضمام سے روزگار کے مواقع اور کام کے حالات متاثر ہو سکتے ہیں۔ خیال رہے کہ انضمام کے بعد بننے والی اس نئی مشترکہ کمپنی پر تقریباً 80 ارب ڈالر کا قرض ہوگا جبکہ سالانہ 6 ارب ڈالر کی بچت کی توقع ظاہر کی گئی ہے۔