واشنگٹن: عالمی ای کامرس کمپنی ایمیزون (Amazon) نے امریکہ میں اپنے ملازمین کی کم از کم اجرت بڑھا کر 20 ڈالر فی گھنٹہ کر دی ہے، جس سے کمپنی میں ملازمین کی اوسط آمدنی 24 ڈالر فی گھنٹہ تک پہنچ گئی ہے۔ کمپنی انتظامیہ کے مطابق ابتدائی اجرت میں 1 ڈالر فی گھنٹہ کا اضافہ کیا گیا ہے۔
اجرتوں میں اضافے کے ساتھ ساتھ ایمیزون نے اپنے ملازمین کے لیے گروسری سہولیات کا بھی اعلان کیا ہے۔ ایمیزون ڈاٹ کام اور ہول فوڈز مارکیٹ آن لائن پر تمام تازہ اشیائے خورونوش پر ملازمین کو بغیر کسی حد (Uncapped) کے 10 فیصد ڈسکاؤنٹ دیا جائے گا، جبکہ ہول فوڈز کے اسٹورز سے خریدار پر 20 فیصد کی رعایت فراہم کی جائے گی۔
ایمیزون اور کاسٹکو (Costco): ایمیزون کی کم از کم اجرت اب کاسٹکو کے برابر آ گئی ہے، جس نے 2025 میں اپنی کم از کم اجرت 20 ڈالر فی گھنٹہ کی تھی۔
ایمیزون کا نیا پے سکیل مارکیٹ کے دیگر بڑے حریفوں سے زیادہ ہے؛ ٹارگٹ (Target) میں ابتدائی اجرت 15 ڈالر اور والمارٹ (Walmart) میں 14 ڈالر فی گھنٹہ ہے۔
ایمیزون کے ورلڈ وائڈ آپریشنز کے سینئر نائب صدر ادت مدن (Udit Madan) نے ایک بلاگ پوسٹ میں لکھا کہ “ہم ایمیزون میں مسلسل بہتری کی بات کرتے ہیں۔ مجھے خوشی ہے کہ یہ سرمایہ کاری ہمارے ملازمین اور ان کے خاندانوں کی طویل مدتی خوشحالی میں مدد کرے گی۔”
واضح رہے کہ امریکہ میں والمارٹ کے بعد ایمیزون 1.1 ملین (11 لاکھ) ملازمین کے ساتھ دوسرا سب سے بڑا نجی شعبے کا آجر ہے۔