نیویارک/ٹورنٹو: شمالی امریکہ میں پاکستانی نژاد ڈاکٹروں کی معروف تنظیم ایسوسی ایشن آف فزیشنز آف پاکستانی ڈیسنٹ آف نارتھ امریکہ (APPNA) کے زیرِ اہتمام نیشنل ہیلتھ کیئر ڈے کا انعقاد ہفتہ 19 ستمبر 2026 کو کیا جائے گا۔
اس ملک گیر فلاحی مہم کا مقصد ’ہوم فرسٹ انیشی ایٹو‘ (Home First Initiative) کے تحت مقامی کمیونٹیز کو مفت اور معیاری طبی سہولیات فراہم کرنا اور صحت سے متعلق عوامی آگاہی کو فروغ دینا ہے۔
تنظیم کے مطابق نیشنل ہیلتھ کیئر ڈے کے سلسلے میں امریکہ اور کینیڈا کے 30 سے زائد مقامات پر مفت طبی کیمپ اور صحت سے متعلق آگاہی پروگرامز منعقد کیے جائیں گے، جہاں مختلف کمیونٹیز سے تعلق رکھنے والے افراد طبی ماہرین سے استفادہ کر سکیں گے
نیشنل ہیلتھ کیئر ڈے کے تحت منعقد ہونے والے میڈیکل کیمپس میں شہریوں کو مختلف بنیادی طبی سہولیات فراہم کی جائیں گی، جن میں:
مفت ہیلتھ اسکریننگ: بلڈ پریشر، بلڈ شوگر اور دیگر ضروری طبی معائنے۔
صحت سے متعلق آگاہی: ماہرینِ صحت کی جانب سے بیماریوں سے بچاؤ، احتیاطی تدابیر اور صحت مند طرزِ زندگی سے متعلق رہنمائی۔
ڈاکٹروں سے مفت مشاورت: مستحق اور غیر بیمہ شدہ افراد کے لیے طبی ماہرین سے مفت مشاورت کی سہولت۔
کمیونٹی ہیلتھ سروسز: مختلف کمیونٹیز میں صحت کے تحفظ اور بیماریوں سے بچاؤ کے حوالے سے شعور اجاگر کرنا۔
نیشنل ہیلتھ کیئر ڈے کی مہم کی قیادت چیئر ڈاکٹر عامرہ رحمان اور APPNA کے صدر برائے 2026 ڈاکٹر بابر راؤ کر رہے ہیں۔
APPNA کے عہدیداران نے عوام سے اپیل کی ہے کہ وہ نیشنل ہیلتھ کیئر ڈے کے تحت منعقد ہونے والے مفت طبی کیمپس سے استفادہ کریں اور اپنے قریبی مرکز پر جا کر دستیاب طبی سہولیات اور ماہرینِ صحت سے مشاورت حاصل کریں۔
تنظیم کے مطابق یہ مہم کمیونٹی کی سطح پر صحت کی بنیادی سہولیات تک رسائی، احتیاطی صحت اور طبی آگاہی کو فروغ دینے کی کوششوں کا حصہ ہے۔