نیویارک (ویب ڈیسک): نیویارک شہر کے میئر زہران ممدانی (Zohran Kwame Mamdani) نے شہر بھر میں گھروں میں چائلڈ کیئر کی سہولیات فراہم کرنے والے (Home-Based Child Care Providers) لائسنس یافتہ افراد کے لیے 3 ملین ڈالر (تقریباً 83 کروڑ پاکستانی روپے) کے نئے ’ایمرجنسی مائیکرو گرانٹ فنڈ‘ کا باضابطہ اعلان کر دیا ہے۔
اس فنڈ کا مقصد ان پرووائیڈرز کو فوری مالی امداد فراہم کرنا ہے جو ناگہانی عوارض یا ہنگامی حالات کی وجہ سے اپنے سینٹرز کو بند ہونے کے خطرے سے بچانا چاہتے ہیں۔
شہر کی انتظامیہ نے فنڈز کے انتظام و انصرام کے لیے ایک موزوں ادارے کے انتخاب کی خاطر باقاعدہ ‘درخواست برائے تجاویز’ (RFP) جاری کر دی ہے۔
میئر زہران ممدانی نے اس اہم پہل کا افتتاح کرتے ہوئے کہا “ہوم بیسڈ چائلڈ کیئر پرووائیڈرز ہمارے بچوں کی دیکھ بھال کے نظام کی ریڑھ کی ہڈی ہیں۔ جب کوئی فریج خراب ہو جائے، پائپ پھٹ جائے یا طوفان سے گھر کو نقصان پہنچے، تو خاندان راتوں رات چائلڈ کیئر کی سہولت سے محروم ہو جاتے ہیں۔ یہ مائیکرو گرانٹ پروگرام اس بات کو یقینی بنانے کے لیے ہے کہ حکومت کسی بحران کے نقصان دہ بننے سے پہلے ہی مدد کے لیے پہنچے۔”
اس فنڈ سے 500 سے زائد لائسنس یافتہ پرووائیڈرز مستفید ہو سکیں گے، جنہیں 1,000 سے 10,000 امریکی ڈالر تک کی ایمرجنسی گرانٹ دی جائے گی تاکہ وہ فوری ہنگامی ضروریات پوری کر سکیں۔
نیویارک کے ہوم بیسڈ پرووائیڈرز مقامی سطح پر 1 لاکھ کے قریب بچوں کو ان کی اپنی زبان اور ثقافت کے مطابق معیاری ماحول فراہم کرتے ہیں۔
میئر آفس آف چائلڈ کیئر اینڈ ارلی چائلڈ ہُڈ ایجوکیشن کی ایگزیکٹو ڈائریکٹر امی لیس (Emmy Liss) نے بتایا کہ اس پروگرام کو خود پرووائیڈرز اور رہنماؤں کے ساتھ مل کر ڈیزائن کیا گیا ہے۔ یہ اقدام میئر کے ’چائلڈ کیئر ایکشن فنڈ‘ کا حصہ ہے، جو نیویارک شہر میں تمام بچوں اور خاندانوں کے لیے مفت، باآسانی دستیاب اور عالمگیر چائلڈ کیئر سسٹم بنانے کی جامع کوششوں کو تقویت فراہم کرتا ہے۔
نیویارک سٹی کونسل کے اراکین جینیفر گوٹیریز، ریٹا جوزف، گیل اے بریور اور کیلا سانٹوسوو نے میئر ممدانی کے اس اقدام کو سراہتے ہوئے اسے محنت کش خاندانوں اور بچوں کی تعلیم و تربیت کے لیے تاریخی قدم قرار دیا ہے۔