نیویارک: شہر کے میئر زوہران کوامے ممدانی نے ایک ریڈیو انٹرویو میں اعلان کیا ہے کہ نیویارک سٹی میں پہلی مرتبہ دو سالہ بچوں کے لیے مفت چائلڈ کیئر پروگرام شروع کیا جا رہا ہے، جسے “2K پروگرام” کا نام دیا گیا ہے۔
گفتگو کے دوران میزبان کیرن کارسن نے اس اقدام کو والدین، بالخصوص ماؤں کے لیے بڑی سہولت قرار دیا۔ اس موقع پر میئر ممدانی کا کہنا تھا کہ نیویارک امریکا کا سب سے مہنگا شہر بن چکا ہے، جہاں رہائش کے بعد سب سے زیادہ خرچ بچوں کی دیکھ بھال پر آتا ہے۔ انہوں نے بتایا کہ کئی خاندان ایک بچے کی چائلڈ کیئر پر سالانہ 20 ہزار ڈالر خرچ کرنے کو بھی قابلِ قبول سمجھتے ہیں۔
میئر کے مطابق یہ نیا پروگرام ہزاروں خاندانوں کے لیے نمایاں ریلیف فراہم کرے گا اور اس کے ذریعے دو سالہ بچوں کو مفت نگہداشت اور ابتدائی تعلیم کی سہولت میسر آئے گی۔
پروگرام کی تشہیر کے لیے ایک جِنگل مقابلہ بھی جاری ہے۔ اسی سلسلے میں ایک ریڈیو ٹیم نے ایک منفرد اور دلچسپ جِنگل پیش کیا، جس میں بچوں کی سرگرمیوں اور والدین کو درپیش مالی مشکلات کو ہلکے پھلکے انداز میں بیان کیا گیا۔
تاہم میئر ممدانی نے جِنگل کو سراہتے ہوئے دو اہم نکات کی نشاندہی کی۔ ان کا کہنا تھا کہ کاپی رائٹ قوانین کے باعث پہلے سے موجود موسیقی استعمال نہیں کی جا سکتی، جبکہ جِنگل میں “myschools.nyc” کا ذکر شامل ہونا بھی لازمی ہے۔ انہوں نے کہا کہ اگر یہ شرائط پوری کی جاتیں تو یہ تخلیق باآسانی فائنلسٹ میں شامل ہو سکتی تھی۔
میئر نے بتایا کہ جِنگل مقابلے میں شرکت کے لیے آخری تاریخ یکم مئی مقرر کی گئی ہے، جبکہ اب تک 100 سے زائد شہری اپنی تخلیقات جمع کرا چکے ہیں۔ انٹرویو کے اختتام پر میزبانوں نے جِنگل کو ازسرِنو تیار کرنے کا عندیہ دیا، جبکہ میئر نے مزید شرکاء کو بھی حصہ لینے کی ترغیب دی۔
“2K پروگرام” کو نیویارک کے خاندانوں کے لیے ایک اہم پیش رفت قرار دیا جا رہا ہے، جو نہ صرف بچوں کی ابتدائی تعلیم کو فروغ دے گا بلکہ والدین پر بڑھتے ہوئے مالی بوجھ میں بھی کمی لانے کا باعث بنے گا۔
