کیلیفورنیا (ویب ڈیسک): واٹس ایپ اپنے آئی فون صارفین کے لیے ایک انقلابی کلاؤڈ بیک اپ فیچر پر کام کر رہا ہے، جس کے تحت صارفین اب ایپل کے آئی کلاؤڈ (iCloud) پر انحصار کرنے کے بجائے اپنی چیٹ بیک اپ فائلوں کو براہِ راست واٹس ایپ کے اپنے محفوظ سرورز پر محفوظ کر سکیں گے۔
مقبول ٹیکنالوجی ویب سائٹ ‘واٹس ایپ بیٹا انفو’ (WABetaInfo) کے مطابق، یہ فیچر اس وقت تیاری کے ابتدائی مرحلے میں ہے اور فی الحال عام صارفین تو دور، بیٹا ٹیسٹرز (Beta Users) کے لیے بھی جاری نہیں کیا گیا۔
موجودہ طریقہ کار کے تحت، آئی فون پر واٹس ایپ چیٹس، تصاویر اور ویڈیوز کا بیک اپ لازمی طور پر ایپل کے آئی کلاؤڈ پر محفوظ ہوتا ہے۔ تاہم، ایپل اپنے صارفین کو مفت میں صرف 5 جی بی (5GB) اسٹوریج فراہم کرتا ہے۔ یہ محدود اسٹوریج آئی فون کے اپنے فوٹوز، ڈیوائس بیک اپ، دستاویزات اور دیگر ایپلیکیشنز کے ساتھ شیئر ہوتی ہے، جس کی وجہ سے واٹس ایپ کا بھاری ڈیٹا بہت جلد اس اسٹوریج کو فل کر دیتا ہے اور صارفین کو اضافی اسٹوریج خریدنی پڑتی ہے۔
اس دیرینہ مسئلے کے حل کے لیے واٹس ایپ نے اپنی الگ کلاؤڈ بیک اپ سروس متعارف کرانے کا فیصلہ کیا ہے۔ اس فیچر کے فعال ہونے کے بعد آئی فون صارفین کے پاس دو متبادل راستے ہوں گے:
وہ روایتی طور پر آئی کلاؤڈ کا استعمال جاری رکھیں۔
یا وہ واٹس ایپ کے اپنے سرورز کو بیک اپ کے لیے منتخب کریں۔
رپورٹ کے مطابق، آئی کلاؤڈ بدستور آئی فون میں ڈیفالٹ (خودکار) بیک اپ آپشن کے طور پر کام کرتا رہے گا۔ جو صارفین کوئی تبدیلی نہیں کرنا چاہتے، انہیں اپنی سیٹنگز چھیڑنے کی ضرورت نہیں ہوگی۔ تاہم، یہ نیا فیچر آئی فون صارفین کو بیک اپ کے لیے زیادہ لچکدار ماحول، بہتر پرائیویسی اور اسٹوریج کے متبادل اور مفت آپشنز فراہم کرے گا