واشنگٹن: مشرقِ وسطیٰ میں دہائیوں پر محیط دشمنی کے خاتمے کی جانب ایک بڑی پیش رفت سامنے آئی ہے جہاں امریکی وزیرِ خارجہ مارکو روبیو کی میزبانی میں اسرائیل اور لبنان کے درمیان پہلی بار براہِ راست امن مذاکرات کا آغاز ہو گیا ہے۔
امریکی وزیرِ خارجہ مارکو روبیو نے واشنگٹن میں اسرائیلی سفیر یخیل لیٹر اور لبنانی سفیر ندی حمادہ معوض کی میزبانی کی۔ یہ تاریخی مذاکرات گرین وچ ٹائم کے مطابق سہ پہر 3 بجے شروع ہوئے، جن کا مقصد دونوں ممالک کے درمیان طویل عرصے سے جاری کشیدگی کو ختم کرنا اور سرحدوں پر امن قائم کرنا ہے۔
دوسری جانب، لبنان میں سرگرم طاقتور مسلح گروپ ‘حزب اللہ’ نے ان مذاکرات کی شدید مخالفت کی ہے۔ جنوبی لبنان میں اسرائیلی افواج کے ساتھ برسرِ پیکار حزب اللہ نے مذاکرات شروع ہونے سے قبل ہی انہیں فوری طور پر منسوخ کرنے کا مطالبہ کیا ہے۔
سیاسی تجزیہ کاروں کے مطابق، مارکو روبیو کی ثالثی میں ہونے والے یہ مذاکرات نہ صرف اسرائیل اور لبنان بلکہ پورے مشرقِ وسطیٰ کے مستقبل کے لیے انتہائی اہمیت کے حامل ہیں۔ اگر یہ مذاکرات کامیاب ہوتے ہیں، تو یہ خطے میں امریکی اثر و رسوخ کی ایک بڑی فتح اور دہائیوں پرانی جنگ کے خاتمے کا پیش خیمہ ثابت ہوں گے۔