واشنگٹن ڈی سی (ویب ڈیسک): امریکی صدر ڈونلڈ ٹرمپ نے جمعرات کے روز ہوم لینڈ سیکیورٹی کی سیکریٹری کرسٹی نوم (Kristi Noem) کو ان کے عہدے سے ہٹا دیا۔ یہ فیصلہ ان کی قیادت، امیگریشن پالیسیوں اور قدرتی آفات سے نمٹنے کے طریقہ کار پر بڑھتی ہوئی تنقید کے پس منظر میں سامنے آیا ہے۔
صدر ٹرمپ نے سوشل میڈیا پر اعلان کیا کہ اوکلاہوما سے تعلق رکھنے والے ریپبلکن سینیٹر مارک وین ملن (Markwayne Mullin) کو اس اہم عہدے کے لیے نامزد کیا جا رہا ہے۔
دوسری جانب کرسٹی نوم کو ایک نئی ذمہ داری دیتے ہوئے “اسپیشل اینوائے فار دی شیلڈ آف دی امریکہز” (Special Envoy for The Shield of the Americas) مقرر کیا گیا ہے، جہاں وہ مغربی نصف کرہ کی سیکیورٹی سے متعلق ایک خصوصی مہم کی سربراہی کریں گی۔
کرسٹی نوم صدر ٹرمپ کی دوسری مدتِ صدارت میں عہدہ چھوڑنے والی پہلی کابینہ رکن ہیں۔ ان کی برطرفی کے پیچھے متعدد عوامل کارفرما بتائے جا رہے ہیں۔
رپورٹس کے مطابق منیاپولس میں امیگریشن حکام کے ہاتھوں دو مظاہرین کی ہلاکت کے بعد ان پر شدید تنقید کی گئی۔ اس کے علاوہ انہوں نے 220 ملین ڈالر کی ایک اشتہاری مہم شروع کی تھی جس میں غیر قانونی طور پر مقیم افراد کو رضاکارانہ طور پر امریکا چھوڑنے کی ترغیب دی گئی تھی، تاہم صدر ٹرمپ کا کہنا تھا کہ اس مہم کی منظوری انہوں نے نہیں دی تھی۔
مزید برآں کانگریس کی جانب سے فراہم کیے گئے اربوں ڈالر کے فنڈز کے استعمال پر بھی ریپبلکن اور ڈیموکریٹ ارکان کی جانب سے ان پر سوالات اٹھائے گئے۔
میڈیا رپورٹس کے مطابق ہوم لینڈ سیکیورٹی کا محکمہ گزشتہ 20 دنوں سے جزوی بندش کا شکار ہے، جس کے باعث متعدد ملازمین تنخواہوں کے بغیر کام کر رہے ہیں۔
سینیٹر مارک وین ملن کی مستقل تقرری کے لیے امریکی سینیٹ کی توثیق درکار ہوگی، تاہم وفاقی قوانین کے تحت وہ اس دوران عبوری طور پر ایکٹنگ سیکریٹری کے فرائض انجام دے سکتے ہیں۔
