واشنگٹن:نومبر میں ہونے والے امریکی مڈ ٹرم انتخابات سے چند ماہ قبل امریکی صدر ڈونلڈ ٹرمپ کی عوامی مقبولیت کی شرح نچلی ترین سطح پر آ گئی ہے۔ ‘فائننشل ٹائمز’ اور ‘فوکل ڈیٹا’ کے مشترکہ سروے کے مطابق صرف 33 فیصد رجسٹرڈ ووٹرز نے صدر ٹرمپ کی کارکردگی پر اعتماد کا اظہار کیا ہے، جو مئی کے بعد سے ریکارڈ کی گئی سب سے کم شرح ہے۔
سروے رپورٹ کے مطابق عوامی مقبولیت میں اس بڑی کمی کی بنیادی وجہ معاشی بدحالی، مہنگائی اور ٹرمپ کی ٹیرف پالیسیوں سے عوام کی عدم اطمینان ہے:
تقریباً دو تہائی ووٹرز کا ماننا ہے کہ ملک کی معیشت غلط سمت میں جا رہی ہے، جبکہ 57 فیصد ووٹرز کے مطابق ٹرمپ کے دورِ حکومت میں ان کے مالی حالات مزید خراب ہوئے ہیں۔
معیشت اور نوکریوں کے شعبے میں ٹرمپ کی کارکردگی کو پسند کرنے والے ریپبلکن ووٹرز کا تناسب 8 فیصد کمی کے ساتھ صرف 53 فیصد رہ گیا ہے۔
ایران کے ساتھ جاری ملٹری تنازع اور آبنائے ہرمز میں کشیدگی کے باعث امریکہ میں ڈیزل کی قیمت 5.85 ڈالر فی گیلن کی بلند ترین سطح پر پہنچ چکی ہے۔ تاہم، صدر ٹرمپ نے اوول آفس میں صحافیوں سے گفتگو کرتے ہوئے ایران تنازع کو معمولی قرار دیا ہے۔
ریپبلکن پارٹی کے لیے مزید تشویشناک بات ‘گیلپ’ (Gallup) کی تازہ ترین رپورٹ ہے۔ اعداد و شمار کے مطابق 31 فیصد امریکی بالغ افراد نے خود کو ڈیموکریٹ کے طور پر رجسٹرڈ کرایا ہے جبکہ 25 فیصد افراد ریپبلکنز کے حامی ہیں۔ ڈیموکریٹس کی یہ 6 پوائنٹس کی برتری پچھلے ایک دہائی سے زائد عرصے میں سب سے بڑی برتری ہے۔