نیویارک: نیویارک شہر کے علاقے ساؤتھ برونکس میں لیجیونیئرز بیماری (Legionnaires’ Disease) کی حالیہ وبا کے باعث ایک اور شہری جان کی بازی ہار گیا ہے، جس کے بعد اس کلسٹر سے ہلاک ہونے والوں کی تعداد 2 ہو گئی ہے.
نیویارک سٹی ہیلتھ کمشنر ڈائریکٹر ایلسٹر مارٹن (Dr. Alister Martin) نے سوشل میڈیا پر اس دوسری ہلاکت کی تصدیق کی ہے۔
محکمہ صحت کے اعداد و شمار کے مطابق ساؤتھ برونکس کلسٹر میں اب تک کم از کم 14 افراد بیمار ہو چکے ہیں جن میں سے 11 کو علاج کے لیے اسپتال منتقل کرنا پڑا۔
ابتدائی طبی ٹیسٹوں کے دوران ساؤتھ برونکس کے 10 کولنگ ٹاورز میں ‘لیجیونیلا’ (Legionella) نامی باکٹیریا پایا گیا، جو کہ نمونیا کی شدید قسم یعنی لیجیونیئرز بیماری کا سبب بنتا ہے۔
ان متاثرہ مقامات میں ینکی اسٹیڈیم (Yankee Stadium) اور نیویارک سٹی ہیلتھ اینڈ ہاسپٹلز کا لنکن میڈیکل فیسیلٹی کا علاقہ بھی شامل ہے۔
ہیلتھ کمشنر ڈاکٹر ایلسٹر مارٹن نے تصدیق کی ہے کہ میلروز (Melrose) اور موریسانیا (Morrisania) کے علاقوں میں تمام متاثرہ کولنگ ٹاورز کی صفائی، ڈرینج اور کیمیکل ڈس انفیکشن کا عمل مکمل کر لیا گیا ہے۔
محکمہ صحت کے عملے نے اب تک ساؤتھ برونکس میں 1,700 سے زائد شہریوں اور 140 سے زائد تنظیموں سے رابطہ کر کے حفاظتی آگاہی فراہم کی ہے۔ انتظامیہ نے زپ کوڈ 10451 اور 10456 کے علاقوں کا دورہ کرنے والے تمام افراد کو ہدایت کی ہے کہ فلو جیسی علامات (بخار، زکام، کھانسی یا جسم میں درد) ظاہر ہونے کی صورت میں فوری طور پر ڈاکٹر سے رجوع کریں۔
واضح رہے کہ اس سے قبل اسی موسمِ گرما میں اپر ایسٹ سائیڈ کے علاقے میں بھی اس بیماری کا شدید پھیلاؤ دیکھا گیا تھا جس میں 94 افراد بیمار اور 11 جاں بحق ہوئے تھے۔ CDC کے مطابق یہ بیماری پانی کے زہریلے نطفوں یا بھاپ کو سانس کے ذریعے اندر لے جانے سے پھیلتی ہے اور اس کی شرحِ اموات تقریباً 10 میں سے 1 بیمار شخص ہے۔