دوحہ(ویب ڈیسک): قطر نے موجودہ علاقائی صورتحال کے پیش نظر پاکستانی شہریوں کے لیے ویزہ آن ارائیول کی سہولت عارضی طور پر بند کر دی ہے۔
پاکستانی سفارت خانے کے جاری بیان میں کہا گیا ہے کہ اس فیصلے کے بعد تمام پاکستانی مسافروں کے لیے ضروری ہے کہ وہ قطر روانگی سے قبل پیشگی ویزہ حاصل کریں۔
سفارت خانے نے خبردار کیا ہے کہ بغیر ویزہ قطر پہنچنے والے شہریوں کو ایئرپورٹ پر امیگریشن حکام کی جانب سے داخلے سے روکا جا سکتا ہے یا انہیں واپس بھیجا جا سکتا ہے۔
مسافروں کو ہدایت کی گئی ہے کہ وہ سفر سے پہلے اپنی تمام ویزہ دستاویزات مکمل کریں اور تازہ ترین معلومات کے لیے قطری حکام یا متعلقہ ویزہ مراکز سے ضرور رابطہ کریں تاکہ کسی بھی قسم کی پریشانی سے بچا جا سکے۔
واضح رہے کہ قطر اس سے قبل پاکستانی شہریوں کو ویزہ آن ارائیول کی سہولت فراہم کر رہا تھا، تاہم حالیہ علاقائی کشیدگی کے باعث اس سہولت کو وقتی طور پر معطل کر دیا گیا ہے۔
