سرکاری ملازمتوں کےبھرتی عمل میں بڑی تبدیلی: میئرممدانی اورلیبریونینزکاسول سروس سسٹم کوجدیدبنانےکاتاریخی معاہدہ

نیویارک: نیویارک سٹی کے میئر زہران ممدانی (Mayor Zohran Kwame Mamdani) اور ڈیپارٹمنٹ آف سٹی وائڈ ایڈمنسٹریٹو سروسز (DCAS) کی کمشنر یومی کیتاسے (Yume Kitasei) نے لیبر یونینز کے ساتھ مل کر شہر کے 140 سال سے زائد پرانے سول سروس سسٹم میں اصلاحات اور سرکاری ملازمتوں پر بھرتی کے عمل کو تیز بنانے کے لیے تاریخی شراکت داری کا اعلان کیا ہے۔

اس مقصد کے لیے “سول سروس ماڈرنائزیشن ایڈوائزری کمیٹی” (Civil Service Modernization Advisory Committee) قائم کر دی گئی ہے، جس کی سربراہی ڈی سی اے ایس کمشنر یومی کیتاسے کریں گی جبکہ نیویارک کی سب سے بڑی میونسپل یونین ‘DC 37’ کے ایگزیکٹو ڈائریکٹر ہنری گاریڈو (Henry Garrido) نائب چیئرمین کے فرائض انجام دیں گے۔

نیویارک نے 1883 میں سب سے پہلے سول سروس کا نظام اپنایا تھا، تاہم پرانی ٹیکنالوجی، پیچیدہ کاغذی کارروائی اور طویل دورانیے کے باعث بھرتیوں میں شدید تاخیر ہوتی رہی ہے۔ نیویارک سٹی 3 لاکھ سے زائد ملازمین کے ساتھ امریکہ کا بڑا نفاذی ادارہ ہے، جہاں 80 فیصد سے زائد ملازمتیں امتحانات کے ذریعے پر کی جاتی ہیں۔

قابلیت کی بنیاد (Merit-based) پر میرٹ کو متاثر کیے بغیر بھرتی کے عمل کو مختصر اور شفاف بنانا۔

21ویں صدی کے تقاضوں کے مطابق جدید ڈیجیٹل انٹرفیس کا قیام تاکہ امیدوار اور ایجنسیاں آسانی سے پورٹل استعمال کر سکیں۔

میونسپل ملازمین کے لیے ترقی کے واضح اور آسان راستے فراہم کرنا۔

اس سے قبل میئر ممدانی نیویارک کے ہائی اسکول کے طلبہ اور پہلی بار امتحان دینے والوں کے لیے سول سروس ایگزامز کی فیس معاف کر چکے ہیں، جبکہ حال ہی میں سٹی ملازمین کے لیے مفت ڈے کیئر سینٹر “دی لٹل ایپل” (The Little Apple) کا بھی افتتاح کیا گیا ہے۔

میئر زہران ممدانی نے کہا، “اپنے شہر کی خدمت کے لیے اچھی تنخواہ والی ملازمت کا حصول آسان، تیز رفتار اور منصفانہ ہونا چاہیے۔ لیبر رہنماؤں کے ساتھ یہ شراکت داری ہمارے سول سروس سسٹم کو نیویارک کی جدید ضروریات کے مطابق ڈھالنے میں اہم ثابت ہوگی۔”