نیویارک: میئر زوہران ممدانی اور محکمہ تحفظِ ماحول (DEP) کی کمشنر لیزا ایف گارسیا نے بروک لین کے علاقے ہوم کریسٹ (Homecrest) میں شدید بارشوں اور سیلابی صورتحال سے نمٹنے کے لیے 95 ملین ڈالر کے جدید ‘کلاؤڈ برسٹ’ (Cloudburst) منصوبے کا اعلان کیا ہے۔
اس جدید منصوبے کا مقصد شہر کے سیوریج سسٹم پر بوجھ کم کرنا اور گلیوں کو دریا بننے سے روکنا ہے۔ ‘کلاؤڈ برسٹ’ ٹیکنالوجی کے تحت محلے کی سطح پر ایسا انفراسٹرکچر تیار کیا جاتا ہے جو شدید بارش کے دوران پانی کو فوری طور پر جذب کر کے زیرِ زمین ٹینکوں میں محفوظ کر لیتا ہے۔ ہوم کریسٹ میں یہ نظام سالانہ تقریباً 30 ملین گیلن بارش کا پانی سنبھالنے کی صلاحیت رکھے گا۔
یہ سسٹم ایک گھنٹے میں 2 انچ سے زائد ہونے والی شدید بارش کو سنبھالنے کے لیے ڈیزائن کیا گیا ہے۔
گلیوں میں ‘پورس پیومنٹ’ (Porous Pavement) یعنی پانی جذب کرنے والا فرش لگایا جائے گا اور اسکولوں، پارکنگ لاٹس اور ٹریفک ٹرائینگلز کے نیچے بڑے اسٹوریج ٹینک بنائے جائیں گے۔
اس منصوبے سے کنگز ہائی وے، کونی آئی لینڈ ایونیو اور ایونیو P سے لے کر V تک کے 350 ایکڑ رقبے کو فائدہ پہنچے گا۔
ماحولیاتی فائدہ: یہ منصوبہ کونی آئی لینڈ کریک (Coney Island Creek) میں گندے پانی کے اخراج کو روک کر آبی معیار کو بہتر بنائے گا۔
میئر ممدانی نے اس موقع پر کہا کہ موسمیاتی تبدیلیوں کے پیشِ نظر ایسے منصوبے اب محض انتخاب نہیں بلکہ شہر کی بقا کے لیے ناگزیر ہو چکے ہیں۔
