نیویارک(ویب ڈیسک): جہاں ایک طرف پورے امریکہ میں ملازمتوں کے اعداد و شمار توقعات سے بہتر رہے ہیں، وہیں نیویارک سٹی کی جاب مارکیٹ جمود کا شکار ہے اور شہر سے ملازمین کی تعداد میں کمی واقع ہو رہی ہے۔
نیویارک سٹی کے کمپٹرولر مارک لیون نے خطرے کی گھنٹی بجاتے ہوئے کہا کہ جنوری 2025 سے جنوری 2026 کے درمیان شہر میں مجموعی طور پر 6,000 سے زائد ملازمتیں ختم ہوئیں، جبکہ صرف نجی شعبے (Private Sector) میں تقریباً 20,000 جابز کا نقصان ہوا۔
ماہرین کے مطابق یہ صورتحال خاص طور پر ان نوجوانوں کے لیے مشکل ہے جو حال ہی میں کالج سے فارغ التحصیل ہوئے ہیں۔
دوسری جانب میئر زہران ممدانی کی انتظامیہ کا کہنا ہے کہ وہ معاشی مساوات، سستی ہاؤسنگ اور بچوں کی نگہداشت (Childcare) میں سرمایہ کاری کر کے معیشت کو مستحکم کر رہے ہیں۔
ڈپٹی میئر جولی سو کے مطابق وفاقی کٹوتیوں اور عالمی غیر یقینی صورتحال نے ترقی کی رفتار کو متاثر کیا ہے، لیکن شہر کی انتظامیہ چھوٹے کاروباروں اور نئے صنعتی مواقعوں کے ذریعے روزگار کے نئے ذرائع پیدا کرنے کے لیے پرعزم ہے۔