نیوارک: نیوارک اسکول آف ڈیٹا سائنس اینڈ انفارمیشن ٹیکنالوجی کے دو ہونہار طالب علموں، عبدال موراکینیو اور برائن اوکو نے اپنی محنت اور دوستانہ مقابلے بازی سے تاریخ رقم کر دی ہے۔
دوسری جماعت سے بہترین دوست رہنے والے ان دونوں نوجوانوں کو امریکہ کی مشہور آئیوی لیگ یونیورسٹی، ‘براؤن یونیورسٹی’ میں داخلہ مل گیا ہے۔
عبدال موراکینیو اپنی کلاس کے ٹاپ پوزیشن ہولڈر (Valedictorian) ہیں جبکہ برائن اوکو دوسرے نمبر (Salutatorian) پر ہیں۔ ان کی دوستی کی خاص بات ان کا تعلیمی مقابلہ ہے، جس نے دونوں کو بلندیوں تک پہنچایا۔ عبدال الیکٹریکل انجینئرنگ جبکہ برائن روبوٹکس انجینئرنگ میں اپنا مستقبل بنانا چاہتے ہیں۔
اسکول کی پرنسپل ڈاکٹر لیانا سمی نے اس کامیابی پر خوشی کا اظہار کرتے ہوئے کہا کہ اسکول کی پانچ سالہ تاریخ میں یہ پہلے طلبہ ہیں جنہوں نے آئیوی لیگ میں جگہ بنائی ہے۔
تاہم، دونوں طالب علموں کے سامنے اب ایک بڑا چیلنج مالی اخراجات کا ہے۔ انہیں جمعہ کی آدھی رات تک فیصلہ کرنا ہے کہ آیا وہ براؤن یونیورسٹی کے تعلیمی اخراجات خود اٹھائیں گے یا کسی ایسی دوسری یونیورسٹی کا انتخاب کریں گے جہاں انہیں مکمل فری ٹیوشن (مفت تعلیم) کی پیشکش ہے۔
