نیویارک: میئر زوہران ممدانی اور محکمہ صفائی (DSNY) کے کمشنر گریگوری اینڈرسن نے اعلان کیا ہے کہ 2027 کے اختتام تک نیویارک سٹی کے مزید چھ کمیونٹی اضلاع میں کوڑے کے تھیلوں کی جگہ 100 فیصد کنٹینرز (Containerization) استعمال کیے جائیں گے۔
اس اقدام کا مقصد فٹ پاتھوں کو کوڑے سے پاک کرنا اور شہر میں چوہوں کی بڑھتی ہوئی تعداد پر قابو پانا ہے۔
اس منصوبے کے تحت بلند و بالا رہائشی عمارتوں کے باہر سڑکوں پر مخصوص “ایمپائر بنز” لگائے جائیں گے۔ یہ کنٹینرز صرف مخصوص بلڈنگ مینیجرز استعمال کر سکیں گے اور انہیں شمالی امریکہ کے پہلے خودکار سائیڈ لوڈنگ ٹرکوں (Automated Side-loading Trucks) کے ذریعے خالی کیا جائے گا۔
2027 کے آخر تک جن علاقوں کو اس پروگرام میں شامل کیا جائے گا ان میں برونکس، بروکلین، مین ہٹن، کوئینز اور اسٹیٹن آئی لینڈ کے اہم اضلاع شامل ہیں۔ میئر ممدانی نے عزم ظاہر کیا ہے کہ 2031 تک پورے نیویارک سٹی سے سڑکوں پر پڑے کوڑے کے تھیلوں کا مکمل خاتمہ کر دیا جائے گا۔
میئر ممدانی نے کہا، “دنیا کے امیر ترین شہر میں کسی نیویارکر کو کوڑے سے بھرے فٹ پاتھوں پر چلنے کی ضرورت نہیں ہونی چاہیے۔ ہم نے منصوبہ بنا لیا ہے، رقم مختص کر دی ہے اور اب ہم ہر محلے میں صاف ستھری سڑکوں کا وعدہ پورا کر رہے ہیں۔”
اس سے قبل ویسٹ ہارلم (Manhattan CD 9) میں یہ تجربہ کامیاب رہا ہے، جہاں گزشتہ جون سے سڑکیں نمایاں طور پر صاف نظر آ رہی ہیں۔