ٹرینٹن، نیو جرسی(ویب ڈیسک): نیو جرسی کے محکمہ صحت نے جمعہ کے روز اعلان کیا ہے کہ ریاست کے دو رہائشیوں میں ممکنہ طور پر ‘ہنٹا وائرس’ (Hantavirus) منتقل ہونے کا خدشہ ہے۔
امریکی مراکز برائے انسدادِ امراض (CDC) کی جانب سے فراہم کردہ معلومات کے مطابق، یہ دونوں شہری دورانِ پرواز ایک ایسے شخص کے قریب موجود تھے جو ‘ایم وی ہونڈیئس’ (MV Hondius) نامی کروز شپ پر سوار تھا۔ حکام کا کہنا ہے کہ اس بحری جہاز سے وابستہ ہنٹا وائرس کی قسم ‘اینڈیز وائرس’ کہلاتی ہے، جو متاثرہ شخص کے ساتھ طویل اور قریبی رابطے یا جسمانی رطوبتوں کے ذریعے ایک انسان سے دوسرے میں منتقل ہو سکتی ہے۔
نیو جرسی کے محکمہ صحت نے واضح کیا ہے کہ فی الحال ریاست میں ہنٹا وائرس کا کوئی تصدیق شدہ کیس موجود نہیں ہے اور زیرِ نگرانی دونوں افراد میں اب تک کوئی علامات ظاہر نہیں ہوئی ہیں۔ محکمہ صحت کے حکام مقامی ایجنسیوں کے ساتھ مل کر ان مسافروں کی نگرانی کر رہے ہیں اور عوام کو یقین دلایا گیا ہے کہ عام شہریوں کے لیے اس وائرس کا خطرہ فی الحال انتہائی کم ہے۔
واضح رہے کہ نیو جرسی کی تاریخ میں اب تک ہنٹا وائرس کا کوئی بھی کیس رپورٹ نہیں ہوا ہے۔ دیگر امریکی ریاستوں کے محکمہ صحت بھی اس کروز شپ سے واپس آنے والے مسافروں کی کڑی نگرانی کر رہے ہیں۔
