لاس اینجلس: لیجنڈری پاپ آئیکون Michael Jackson نے ایک بار پھر ثابت کر دیا کہ حقیقی فنکار وقت کی حدود سے ماورا ہوتے ہیں۔ اپنی وفات کے 17 سال بعد بھی وہ دنیا بھر کے اسٹریمنگ پلیٹ فارمز پر سب سے زیادہ مقبول آرٹسٹ بن گئے ہیں۔
حالیہ گلوبل ڈیجیٹل رینکنگ کے مطابق مائیکل جیکسن نے موجودہ دور کے بڑے میوزک اسٹارز جیسے Taylor Swift اور Justin Bieber کو واضح فرق سے پیچھے چھوڑ دیا ہے۔
میوزک ماہرین کے مطابق ان کی زندگی پر بننے والی فلم Michael کی زبردست کامیابی نے ان کے کلاسک گانوں کو ایک بار پھر نئی نسل میں مقبول بنا دیا ہے۔ فلم کے بعد 70 اور 80 کی دہائی کے ان کے مشہور ٹریکس دوبارہ عالمی اسٹریمنگ چارٹس میں تیزی سے اوپر آئے، جس کے نتیجے میں وہ عالمی سطح پر پہلے نمبر پر پہنچ گئے۔
اعداد و شمار کے تجزیے سے وابستہ ادارے Chartmetric کی مئی 2026 کی رپورٹ کے مطابق مائیکل جیکسن نے 11,157 پوائنٹس کے ساتھ پہلی پوزیشن حاصل کی، جبکہ دوسرے نمبر پر موجود جسٹن بیبر سے وہ تقریباً 5,000 پوائنٹس آگے رہے۔
دلچسپ طور پر مائیکل جیکسن YouTube، Apple Music، Deezer اور دیگر بڑے پلیٹ فارمز پر سرفہرست ہیں، جبکہ Spotify پر بھی وہ معمولی فرق سے دوسرے نمبر پر موجود ہیں۔ ٹیلر سوئفٹ اس فہرست میں پانچویں پوزیشن پر رہیں۔
ماہرین کا کہنا ہے کہ مائیکل جیکسن صرف ایک گلوکار نہیں بلکہ ایک عالمی ثقافتی مظہر تھے، جن کی موسیقی نسلوں کو متاثر کرتی رہے گی۔ ان کی دیرپا مقبولیت اس بات کا واضح ثبوت ہے کہ ان کا فن آج بھی اتنا ہی طاقتور ہے جتنا اپنے عروج کے دور میں تھا۔
