نیویارک: میئر زوہران ممدانی اور اسکول چانسلر قمر سیموئلز نے نیویارک سٹی کے خاندانوں کے لیے خوشخبری سناتے ہوئے سات نئے ارلی چائلڈ ہڈ ایجوکیشن سینٹرز کھولنے کا اعلان کیا ہے۔
ان مراکز کے قیام سے شہر بھر میں 3-K (تین سالہ بچوں کی تعلیم) کی تقریباً 240 نئی نشستیں فراہم کی جائیں گی۔
یہ نئے مراکز ان جگہوں پر کھولے جا رہے ہیں جو پہلے خالی تھیں، جس کا مقصد موجودہ جگہ کا بھرپور استعمال کرنا اور خاندانوں کو ان کے گھروں کے قریب معیاری تعلیم فراہم کرنا ہے۔
میئر ممدانی نے اس موقع پر کہا، “ہم وہ دروازے کھول رہے ہیں جو ہمارے خاندانوں کے لیے کبھی بند نہیں ہونے چاہیے تھے۔ ہم نیویارک کے باسیوں کو وہ مفت اور ہمہ گیر چائلڈ کیئر فراہم کر رہے ہیں جس کے وہ حقدار ہیں۔”
تعلیمی سال 2026-27 کے لیے جن اضلاع میں مراکز فعال ہوں گے ان میں
ڈسٹرکٹ 11: ایسٹ گن ہل روڈ
ڈسٹرکٹ 15: اٹلانٹک ایونیو
ڈسٹرکٹ 22: ایسٹ 57 اسٹریٹ
ڈسٹرکٹ 24: فریش پونڈ روڈ، روزویلٹ ایونیو، اور 76 اسٹریٹ
ڈسٹرکٹ 25: 131 اسٹریٹ شامل ہیں۔
نئے پروگراموں کی تفصیلات MySchools ( https://myschools.nyc/en/ )پورٹل پر دستیاب ہوں گی۔ وہ خاندان جو پہلے ہی اپلائی کر چکے ہیں، انہیں ای میل کے ذریعے درخواست اپ ڈیٹ کرنے کا طریقہ بتایا جائے گا، جبکہ ڈیڈ لائن سے محروم رہنے والے والدین ویٹ لسٹ (Waitlist) میں شامل ہو سکتے ہیں۔
یاد رہے کہ ممدانی انتظامیہ نے جنوری 2026 سے اب تک دو سالہ بچوں کے لیے 2-K پروگرام کا آغاز بھی کیا ہے، جس کا مقصد نیویارک میں ہمہ گیر چائلڈ کیئر کے خواب کو شرمندہ تعبیر کرنا ہے۔
