نیویارک: ایک غیر منافع بخش ادارے ‘بروک لین لاء گروپ’ کی حالیہ رپورٹ میں انکشاف ہوا ہے کہ ٹرمپ انتظامیہ کے تحت حراست میں لیے گئے تارکینِ وطن کے لیے بانڈ (ضمانت) پر رہائی کے امکانات انتہائی کم ہو گئے ہیں۔
رپورٹ کے مطابق، 2025 میں امیگریشن ججوں نے صرف 19 فیصد کیسز میں بانڈ کی اجازت دی، جو کہ ڈیٹا ٹریکنگ کے آغاز سے اب تک کی کم ترین شرح ہے۔ مزید برآں، 2026 کے پہلے چار ماہ میں یہ شرح مزید گر کر صرف 17 فیصد رہ گئی ہے۔
مطالعے میں یہ بھی بتایا گیا ہے کہ بانڈ کی رقم میں بھی ہوش ربا اضافہ ہوا ہے۔ بائیڈن انتظامیہ کے دوران اوسط بانڈ کی رقم تقریباً 8,500 ڈالرز تھی، جو اب دوسرے ٹرمپ دور میں بڑھ کر 14,000 ڈالرز سے تجاوز کر چکی ہے۔
وکلاء کا کہنا ہے کہ حکومت اب یہ موقف اختیار کر رہی ہے کہ کئی تارکینِ وطن بانڈ کی سماعت کے اہل ہی نہیں ہیں، جس کا مطلب ہے کہ لوگ اپنے کیسز کے فیصلے تک مہینوں یا سالوں تک ‘آئی سی ای’ (ICE) کی حراست میں رہ سکتے ہیں۔