کاراکاس(ویب ڈیسک): امریکہ اور وینزویلا کے درمیان سفارتی اور تجارتی تعلقات میں ایک نئی تاریخ رقم ہوگئی ہے۔ جمعرات کو سات سال کے طویل وقفے کے بعد پہلی براہ راست کمرشل پرواز میامی سے وینزویلا کے دارالحکومت کاراکاس پہنچی۔
یہ پیش رفت امریکی محکمہ ہوم لینڈ سیکیورٹی کی جانب سے 2019 میں سیکیورٹی خدشات کی بنا پر معطل کی گئی پروازوں کے بعد سامنے آئی ہے۔ پروازوں کی بحالی جنوری میں صدر نکولس مادورو کی گرفتاری اور دونوں ممالک کے درمیان مکمل سفارتی تعلقات کی بحالی اور امریکی سفارت خانہ دوبارہ کھلنے کے ایک ماہ بعد ہوئی ہے۔
امریکن ایئرلائنز کی ذیلی کمپنی ‘اننوائے ایئر’ (Envoy Air) کی پرواز AA3599 میامی سے روانہ ہوئی اور تقریباً تین گھنٹے بعد کاراکاس پہنچی۔ افتتاحی پرواز کے مسافروں میں ‘یو ایس نیشنل انرجی ڈومیننس کونسل’ کے ڈائریکٹر جیرڈ ایگن بھی شامل تھے، جو وینزویلا میں توانائی اور کان کنی کے شعبوں میں امریکی کمپنیوں کی رسائی کے حوالے سے اہم ملاقاتیں کریں گے۔
میامی ڈیڈ کاؤنٹی کی میئر ڈینیلا لیوین کاوا نے اس موقع پر کہا کہ یہ پروازیں بکھرے ہوئے خاندانوں کو ملانے کا ذریعہ بنیں گی کیونکہ میامی وینزویلا کی سب سے بڑی کمیونٹی کا گھر ہے۔ ایئر لائن نے اعلان کیا ہے کہ 21 مئی سے روزانہ دوسری پرواز کا آغاز بھی کر دیا جائے گا۔
