نیویارک: مائیکروسافٹ کے بانی اور دنیا کے امیر ترین اشخاص میں شامل بل گیٹس کی 23 سالہ بیٹی، Phoebe Gates، ان دنوں انٹرنیٹ صارفین کے نشانے پر ہیں۔ ان پر الزام ہے کہ انہوں نے ایک سوشل میڈیا انفلوئنسر کو اپنے اسٹارٹ اپ کے لیے انتہائی کم معاوضے کی پیشکش کر کے اسے “گیس لائٹ” (Gaslighting) کرنے کی کوشش کی ہے۔
معروف مواد تخلیق کار (Content Creator) Kacie Margis نے دعویٰ کیا ہے کہ فیبی گیٹس نے اپنے AI شاپنگ ٹول Phia کی تشہیر کے لیے ان سے رابطہ کیا۔ کیسی مارگس کے مطابق، ان کے ریٹس سوشل میڈیا پلیٹ فارم ‘Collabstr’ پر واضح طور پر درج ہیں، لیکن فیبی نے انہیں براہِ راست پیغام (DM) بھیج کر معاوضہ کم کرنے کی بات کی۔
فیبی گیٹس نے اپنے پیغام میں لکھا:”ہم ابھی ایک Scrappy Startup ہیں اور ہمارا بجٹ انتہائی محدود (Super Limited Budget) ہے، لیکن اگر آپ کام کرنے میں دلچسپی رکھتی ہیں تو اپنے ریٹس بھیج دیں۔”
کیسی مارگس نے اس پر ردِعمل دیتے ہوئے کہا کہ ایک ارب پتی کی بیٹی، جس کے والد کے اثاثے 140 ارب ڈالر ہیں، کا $250 سے بھی کم معاوضے کے لیے ‘بجٹ کی کمی’ کا بہانہ بنانا ناقابلِ فہم ہے۔
سوشل میڈیا پر اس خبر کے وائرل ہوتے ہی صارفین نے فیبی گیٹس کو “کینسر” اور “فراڈ” جیسے القابات سے نوازنا شروع کر دیا۔ صارفین کا کہنا ہے کہ:
ایک طرف فیبی مہنگے ڈیزائنر زیورات پہنتی ہیں اور دوسری طرف غریب تخلیق کاروں کو ان کا جائز حق دینے سے کتراتی ہیں۔
کچھ ناقدین نے الزام لگایا کہ فیبی گیٹس دیگر اسٹارٹ اپس کے آئیڈیاز اور مارکیٹنگ چوری کر رہی ہیں۔
صارفین نے طنز کیا کہ اگر بجٹ اتنا ہی کم ہے تو وہ اپنے قیمتی بریسلیٹ بیچ کر اسٹارٹ اپ کو فنڈ کیوں نہیں کرتیں؟
فیبی گیٹس کا موقف: “میں اپنے دم پر کچھ کرنا چاہتی ہوں”
دوسری جانب، فیبی گیٹس اپنے کاروبار کو اپنے خاندانی نام اور دولت سے دور رکھنے کی کوشش کر رہی ہیں۔ ایک حالیہ پوڈ کاسٹ “Opening Bid Unfiltered” میں انہوں نے کہا کہ انہوں نے اپنے والد سے پیسے لینے سے انکار کر دیا ہے تاکہ وہ اپنی صلاحیتوں کو ثابت کر سکیں۔ انہوں نے مزید کہا کہ وہ اپنے والد کی اس نصیحت پر عمل کر رہی ہیں کہ “ایک بہترین ٹیم ہی کسی بھی کاروبار کی بنیاد ہوتی ہے۔”
واضح رہے کہ فیبی کا برانڈ ‘Phia’ ایک ایسی AI ٹیکنالوجی پر مبنی ہے جو فیشن کے شوقین افراد کو سستی اور پرانی ڈیزائنر پوشاک ڈھونڈنے میں مدد دیتی ہے، اور اس کمپنی کی مالیت تقریباً 180 ملین ڈالر بتائی جا رہی ہے۔
